Ностальгия: “Сан Сиро”да катта жанг!

Бугун тунда бизни катта ўйин кутмоқда. 

Италия футболининг ёши улуғ мухлислари бир шаҳар ва бир стадионда истиқомат қилувчи “Интер” ва “Милан” клублари беллашувининг нақадар улкан қарама-қаршиликка эга эканлигини яхши билади. Ўз даврида, “Кичик жаҳон чемпионати” дея таъриф берилган Италия А Серияси бугун ёндош лигаларнинг-да ривожланиши оқибатида бироз мавқейини йўқотди. Аммо яна Апеннин яриморолида интрига катталашиб кетди. Жорий мавсумда “Ювентус”нинг 9 йиллик чемпионлик сериясига барҳам берилиши кутиляпти. Бироқ, “кекса сеньора”нинг ҳам Скудетто учун курашда катта имкониятларга эга эканлигини яхши англаб турибмиз. 

Мавзудан четлашдик, чунки бугун “бузоқчалар ўлкаси”нинг икки гранди Италия кубоги баҳсида ўзаро тўқнаш келади. Кўҳна Миланнинг ушбу жамоаларининг бугунги тўқнашув олдидан имкониятлари қандай? 

“Интер”

“Нерадзуррилар” сўнгги маротаба Италия кубогини 2011 йилда қўлга киритганди. Жорий мавсумда Антонио Конте бошчилигидаги жамоа Жозе Моуриньо давридан буён илк маротаба “олтин дубль” қайд этишга яқин турибди. Албатта, ҳали мавсумнинг жуда катта қисми олдинда. Бироқ, уларнинг ушбу йўлдаги имкониятларини ошириб юборадиган бир жиҳат бор. “Илонлар” ЕЧЛдаги омадсизликдан сўнг, мавсумни еврокубокларсиз ўтказадиган бўлди. Бу улардаги босимни қисман йўқотади. Бугун Европанинг барча клублари футболчиларнинг тикланиш жараёнларига вақт етмаслиги муаммосига дуч келяпти. Бунда, баъзи мусобақалардан воз кечишга мажбур бўлинмоқда. Ушбу ҳолатдан келиб чиқиб, Антонио Конте бугунги баҳсда номдор футболчилари хизматидан фойдаланишини тахмин қилишимиз мумкин. 

Бугунги беллашувда Данило Д'амброзио катта эҳтимол билан жамоасига ёрдам бера олмайди. Аммо унинг йўқ эканлиги “Интер” учун муаммоли ҳолат эмас: Ашраф Ҳакими унинг ўрнини бемалол тўлдира олади. Ярим ҳимоя чизиғида Роберто Гальярдини ва Стефано Сенсининг асосий таркибда ўйинни бошлашини кутишимиз мумкин. Артуро Видаль эса бугун майдонда кўриниш бермаслиги айтилмоқда. 

Тахминий таркиб: Ханданович, Бастони, Де Врей, Шкриньяр, Перишич, Гальярдини, Брозович, Барелла, Янг, Мартинез, Лукаку. 

“Милан”

Бугун “Милан” таркибидаги бир қанча шахслар учун алоҳида беллашув. Ҳа, улар тез-тез мана шундай учрашувларда майдонга тушиб туради. Аммо барибир, хотиралар ўз таъсирини кўрсатади. Стефано Пиолининг “Интер” билан боғлиқ хотиралари мавжуд. Златан Ибрагимович ўзининг кўплаб собиқ клублари орасида “нерадзуррилар”ни ҳам қайд этиб қўйган. 

“Милан” “Аталанта”га қарши ўйинда қақшатқич мағлубиятга учради ва кайфияти жойида эмас. Қайсидир маънода, уларнинг ҳолати яраланган шерникига ўхшаб кетса керак. Жамоа қишки трансфер ойнасида фаол харидларни амалга оширмоқда. Чунки, клуб раҳбарияти жамоа потенциали совринлар ютишга етишини тушуниб қолди. Демак, энди амбициялар ўзгарди. “Россонерилар” ўзи учун янги даврни бошламоқда. Стефано Пиолини ўйлантирадиган жиҳатлар мавжуд. Асосий дарвозабон Жанлуижи Доннарумма аввалги босқичдаги қизил карточкаси сабаб, дербида иштирок эта олмайди. Ҳимоя марказида яқиндагина “Челси”дан харид қилинган Фикайо Томори Романьоли ва Симон Кьерга яхшигина рақобат туғдириши аниқ. Яхшиямки, Киприан Татарушану дарвозабон позицияси учун захира вариант сифатида харид қилинганди. “Нант”нинг собиқ футболчиси бугун катта ўйинда майдонга тушади. “Қизил-қоралар” таркибида Чалханўглу, Беннасер ва Романьоли сафга қайтди. Шунингдек, Франк Кесси, Алекс Салемакерс ва Ребич ҳам яхши формага чиқиб олган. 

Тахминий таркиб: Татарушану, Далот, Романьоли, Кьер, Эрнандес, Тонали, Кесси, Кастильехо, Диаз, Леау, Ибраҳимович.

Мураббийлар фикри:

Антонио Конте: “Бугун иккала жамоа учун ҳам топга чиқиш учун ўта муҳим ўйин бўлиб ўтади. Биз 3 ой олдинги А Сериядаги мағлубиятимиз учун бугун боримизни бериб ўйнамоқчимиз. Мақсадимиз битта: ҳамшаҳарларимизни енгиш. Ўйин қийин бўлади, албатта иккала томон учун ҳам. Лекин биз ўзимизга ишонамиз.”

Стефано Пиоли: “Кубок баҳси. Тўғри, мураккаб турнир. Лекин биз шу ергача етиб келдик. Ўйин 90 дақиқа ёки 120 дақиқа давом этиши ҳам мумкин, буни вақт кўрсатади. Бу жамоалар тўқнашганида, доим даҳшатли қарама-қаршилик юзага келган, бу сафар ҳам шундай. Биз кубок ҳақида ҳам ўйлаймиз, бу ўйинга шунчаки қарамаймиз. Жамоамда иштиёқ бор ва бу албатта натижага таъсир кўрсатади.”

Хулоса ўрнида.

Бизнинг фикримизча, бугунги баҳс ғолиби асосий вақтнинг ўзида маълум бўлиши қийин. Ҳаттоки, пенальтилар серияси ҳам бўлиши мумкин. Лекин нима бўлган тақдирда ҳам, “Интер” футболчиларининг кўзида қасос ўти ёнаётганлиги боис, бугунги ўйинда уларнинг имконияти юқорироқдек кўринмоқда. Сўнгги икки дербидаги аламли мағлубиятлар жавоби бугун олиниши мумкин. Бироқ, бу шунчаки тахмин, барчасини вақт кўрсатади. Бирга кузатамиз!

Абдулвосид Валихонов тайёрлади.