Аббос гол урмаслиги, ассист қайд этмаслиги керак...

Ўзбек футболининг сўнгги йиллардаги энг ёрқин истеъдодлари сифатида хорижда муваффақиятли тўп тепаётган Аббосбек Файзуллаев ва Абдуқодир Ҳусановни кўрсатиш мумкин.

Абдуқодир бугунги кунда Франция чемпионатининг кашфиётига айланди. Европанинг қатор қудратли клублари 20 ёшли ҳимоячини ўз сафида кўришни орзу қила бошлади. Ҳусановнинг трансфер суммаси қисқа фурсатда бир неча баравар кўтарилиб, 12 миллион еврога етди. Легионеримиз бугунги кунда Марказий Осиёнинг энг қиммат ўйинчига айланди.

Аббосбек эса, икки йилдан бери Россия футболида порлаяпти. Файзуллаев ҳам Европанинг кучли лигаларига йўл олишга бел боғлаган талантларимиздан.

Легионер мақомини олганидан бери унинг ҳам трансфер суммаси кескин ошди ва айни пайтда ўйинчимизнинг нархи 8 миллион еврога баҳоланяпти.

Аббосбек Файзуллаев Осиёнинг 2024 йилдаги энг яхши ёш ўйинчиси бўлди. Бундан ташқари, кетма-кет иккинчи бор Ўзбекистоннинг энг зўр футболчисига аталган совринни қўлга киритди. Бу ютуққа Абдуқодир Ҳусанов ҳам даъвогарлик қилганди.

Ўзбекистон миллий терма жамоасининг собиқ ҳимоячиси Виталий Денисов янги авлод вакиллари орасида ўз иқтидорини намойиш қилиб келаётган икки ўйинчи ҳақида ўз фикр-мулоҳазаларини билдирди.

- Аббосбек Файзуллаевга энг яхши футболчи номинациясида рақобат туғдира оладиган ўйинчилар бор, албатта. Мен Аббосбек бу йил шу совринга муносиб ўйин кўрсатди, деб айта оламан. Буни Россия чемпионатидаги ўйинлари ва Ўзбекистон миллий терма жамоасининг охирги пайтлардаги учрашувларида қандай ўйнаганидан билиб олиш мумкин. Файзуллаев бу совринга ўз ҳаракати ва иштиёқи орқали муносиблигини кўрсата олди.

“Ланс”да ўйнаётган Ҳусанов ҳам бор. Ёш йигит, унинг бир неча учрашувдаги ўйинини кузатдим. Агар у шу тақлид давом этса, унинг фаолияти янада юксалиб кетади, деб ўйлайман.

Ҳусанов ва Файзуллаевнинг майдондаги позициялари бир биридан фарқ қилади, албатта. Ҳусанов яхши ҳимоячи бўлгани билан ўзининг устун томонларини кўрсатиши учун нима қилиши керак? Унда Аббос гол урмаслиги, ассист қайд этмаслиги керак. Абдуқодирнинг ўзи эса, доим бошланғич таркибда бўлиши, кўп учрашув ўтказаши, қўпол хатоларга йўл қўймаслиги, голли паслар узатиб, ўзи ҳам 4-5 та тўп киритиши шарт.

Ҳимоячига бундай совринларни ютишда ҳужумкор футболчилар билан рақобатлашиш жуда оғир. Чунки ҳимоячиларга қараганда, олдинги чизиқдаги ўйинчиларнинг самараси кўпроқ кўзга ташланади, - деди Виталий Денисов.

Эслатиб ўтамиз, Абдуқодир Ҳусанов жорий мавсумда “Ланс” сафида барча турнирларда 15 маротаба майдонга тушди.

Аббосбек Файзуллаев ЦСКА футболчиси сифатида 23 та ўйинда иштирок этиб, учта гол ва олтита ассист қайд этди.

Франция ва Испаниядан бўлган чорлов ортидан Файзуллаевнинг маоши ошди!

“Рома” Шомуродов бўйича қандай қарорга келди?

Ҳусанов “ёндиряпти”, у катта ўзгариш қилди!