“Барса” ҳайдаётган футболчининг харидори кўпайиб кетди

“Барселона” раҳбарияти молиявий аҳволдан келиб чиқиб, айрим ўйинчиларни сотиб юборишига тўғри келмоқда. Акс ҳолда клуб янги бош мураббий Ханс-дитер Флик сўраган бошқа ижрочиларни жамоага таклиф қила олмайди.

Маълумотларга кўра, каталонияликлар франциялик легионер Клеман Лангледан тезроқ қутилишга ҳаракат қилмоқда.

Франциялик футболчини ўз сафида кўрмоқчи бўлган жамоалар сони ортиб боряпти. Сўнгги маълумотларга қараганда, тажрибали ўйинчини “Наполи”, “Вест Хэм” ва “Севилья” каби клублар ўзига чорламоқда.

Айниқса, “Наполи”нинг янги бош мураббийи Антонио Конте клуб хўжайинларидан Клеман Ланглени олиб келишни сўраяпти.

“Вест Хэм” ва “Севилья” эса, ҳимоячи маошининг бир қисмини тўлаган ҳолда, уни бир мавсумга ижарага олмоқчи. Бу талаб “Барселона” вакилларини қониқтирмаяпти.

Каталонияликлар бир неча мавсумдан бери асосий таркибга кира олмаётган Лангле билан шартномани бекор қилиб, унга эркин агент мақомини бермоқчи. Бироқ футболчи бу вариантга кўнгани йўқ.