Жокович ҳеч кимни аяб ўтирмайди
Ads

Буюк Британиянинг Лондон шаҳрида Профессионал теннисчилар уюшмасининг - АТР якуний чемпионатининг Иван Лендль гуруҳидаги баҳслар ниҳоясига етди. 

Ушбу гуруҳдаги учинчи тур учрашувида бунгача иккита ўйинни бой берган франциялик Гаэль Монфис пешқадам теннисчи сербиялик Новак Жокович билан куч синашиши лозим эди. Бироқ, мазаси қочган Монфис ўз ўрнини бельгиялик Давид Гоффенга бўшатиб берди. 

Бироқ Бельгия вакили ҳам Новак Жоковични тўхтата олмади. Учрашувда 6:1, 6:2 ҳисобида зафар қучган сербиялик теннисчи  биринчи бўлиб ярим финалга йўлланма олди. 

Гуруҳдаги иккинчи йўлланма тақдири биттадан ғалаба ва мағлубият қайд этган Канада вакили Милош Раонич ва австриялик Доминик Тим ўртасидаги учрашувда ҳал бўлди. Унда канадалик ракетка устаси 7:6,  6:3 ҳисобида ғалаба қозониб, плей-оффга йўл олди.

SPORTS.uz