"Liverpul"da Milnerdan so‘ng 7-raqamni kim egallashi aniq bo‘ldi

Luis Dias 2022 yilning yanvar oyida "Liverpul"ga o‘tgandan so‘ng, 23-raqamni qo‘lga kiritdi. Bir yarim yildan so‘ng kolumbiyalik futbolchi o‘z raqamini o‘zgartirishga qaror qildi. Mersisaydliklar klubi matbuot xizmatining xabar berishicha, endi Diasning formasida 7-raqam bo‘ladi.

Avvalroq, "Liverpul" uchun ettinchi raqam ostida Jeyms Milner o‘ynagan. U shartnomasi tugashi sababli klubni tark etdi va endi "Brayton"da o‘ynaydi.

"Qizillar" muxlislari Luis Diasning 23 raqamli futbolkalarini klub do‘konidan sotib olgan holda ularni yangi 7 raqamli futbolkalarga bepul almashtirishlari mumkin bo‘ladi.