Ўзбек боксчиси WBA жаҳон чемпиони билан жанг ўтказиш бўйича келишувга эришди

WBA версияси бўйича суперўрта вазнда жаҳон чемпиони ҳисобланган Хайме Мунгия жамоаси ўзбекистонлик мажбурий даъвогар Бектемир Мелиқўзиев томони билан келишувга эришгани маълум қилинди. 

Бокс оламидаги инсайдер Сесар Седа маълумотига кўра, Мелиқўзиев 31 октябр куни Саудия Арабистонида Мунгиянинг россиялик Никита Зонга қарши жанг ўтказишига розилик берган. Шу билан бирга, келишувга кўра, ушбу жангдан сўнг мексикалик чемпионнинг навбатдаги рақиби айнан ўзбекистонлик боксчи бўлиши шарт.

31 октябрдан кейин томонларга мажбурий ҳимоя жангининг шартларини якуний келишиб олиш учун энг кўпи билан 30 кун вақт берилади. Мунгия Мелиқўзиев билан рингга тушмагунча, бошқа рақиблар билан, жумладан, чемпионлик камарларини бирлаштириш жангларини ҳам ўтказа олмайди. 

Чемпион жамоаси шунингдек мажбурий ҳимояни кечиктиришга қаратилган бирор ҳаракат қилмаслик ва боксчига WBA супержаҳон чемпиони мақомини олиш учун мурожаат этмаслик мажбуриятини ҳам ўз зиммасига олган.

Шу билан бирга, икки жамоа ўртасидаги ушбу келишув ҳали WBA томонидан расман маъқулланиши керак. Мунгия ва Мелиқўзиев ўртасидаги эҳтимолий жанг санаси ва ўтказилиш жойи ҳозирча эълон қилинмаган.