1:0 билан энг сара ғалабалар сари!

Ёдингиздами, “Андижон” – “Пахтакор” учрашуви олдидан Sports.uz сайтида мақола чоп этилган бўлиб, унда “Бобур арена”да “мўъжиза” кўрамизми, деганча муносабат билдирилганди. Ахир тан олайлик, ўйиндан аввал ким ишонганди, “Андижон”нинг “Пахтакор”ни мағлуб этишига?! Лекин андижонликлар ростдан ҳам “Бобур арена”да ўша “мўъжиза”ни ярата олдилар. Бу борада гап бўлиши мумкин эмас.

Амалдаги чемпион ва бу йил ҳам катта эҳтимол билан яна олтин медалга сазовор бўлаётган “шерлар”нинг бу йилги мағлубиятсиз сериясини охирги ўриндаги “Андижон” тўхтата олгани бу нимадан далолат, биласизми? “Бургутлар” ҳали курашдан чиқмагани ва қийин вазиятда характер кўрсата олишини намойиш этди. Ахир бу ўйиндан тўрт кун аввал “Андижон” ўз уйида ютиши керак бўлган учрашувда “Металлург”га жуда-жуда аламли мағлубиятга учраганди. Бундай ўйиндан кейин, боз устига кимсан “Пахтакор”га қарши футболчиларни руҳлантириш анча-мунчасининг қўлидан келмади, аммо Виктор Кумиков буни уддалади.

Дарвоқе, учрашувдан аввал стадионда мезбонларнинг мураббийларидан бири андижонлик Расул Раҳмонов билан учрашув қандай кечиши мумкинлиги юзасидан ўзаро фикр алмашганимизда у “мана кўрасиз, бугун “Андижон” сюрприз кўрсатади”, деганида бу гапидан бироз ажаблангандик, аммо бизга қизиқ туюлганди. Якунда нима бўлганини энди ўзингиз жуда яхши биласиз.

кумиков1_1

Яна бир гап: “Пахтакор”ни Андижонга охирги ташрифи 2016 йилга тўғри келган ва ўшанда ҳам 1:0 ҳисобида “Андижон” клуби ғалаба қозонганди. Беш йилдан сўнг бу ерга келган “Пахтакор” яна ўша ҳисобда ютқазди. Биз бугун эътиборингизни бошқа бир жиҳатга қаратмоқчимиз. “Андижон” ҳозирга қадар тўрт марта ғалаба қозонди. Шундан учтаси яққол ажралиб турибди.

12-тур. “Навбаҳор” – “Андижон” – 0:1.

“Андижон” чемпионатдаги биринчи ғалабасини иккинчи турда қўлга киритганди. Ўша пайтда ўз майдонида “Сурхон”ни 1:0 ҳисобида мағлубиятга учратган. 10 та турдан сўнг, андижонликлар иккинчи ғалабасига эришди. Бу жуда узоқ кутилган ғалаба эди. Доим Намангандаги ўйинлар кутилганидан-да мураккаб кечиб, Ўзбекистон чемпионати йўлга қўйилганидан бери ҳали “Навбаҳор”нинг майдонидан уч очко билан қайтмаган. Тасаввур қиляпсизми, “Андижон” Наманганда ютмаган! Лекин бу мавсумда ниҳоят ушбу қора анъанага барҳам берилди. Айниқса, қарши ҳужумда Усмонали Исмоналиев 90+4-дақиқада Ўткир Юсупов дарвозасини ишғол этиши “Андижон”нинг ғалабасига янада кўрк қўшганди. Ўша пайтда жамоа устози Ёрқин Назаров эди. Кейинчалик “Андижон”дан кетганидан сўнг Sports.uz сайтига берган интервьюсида “Навбаҳор” устидан қозонилган ғалаба ҳақида ҳам тўхталиб, клуб тарихидан жой олгани билан фахрланишини айтганди.

андижон000_1

17-тур. “Машъал” – “Андижон” – 0:1.

Худди “Навбаҳор” билан ўйинда бўлгани каби “Андижон” ҳали “Машъал” майдонида ҳам умуман ғалаба қозонмаганди. Қачонки, Виктор Кумиков клубга бош мураббий бўлиб келганидан кейингина у собиқ жамоасини ютиш орқали “Андижон”нинг илк бор Муборакда ғалаба қозонишини таъминлади. Қолаверса, бу Кумиковнинг “Андижон” бош мураббийи сифатида илк муваффақияти ҳам эди. Ўтган йили ишлаганида ҳам жамоани ғалабасиз тарк этгани ёдингизда бўлса керак-а? Айнан “Машъал” билан учрашув орқали Виктор Балютович “Андижон”даги фаолиятида биринчи ютуғига эришди. Қизиғи, ўша учрашувда ҳам ягона гол муаллифи яна Усмонали Исмоналиев бўлди. Бу сафар у пенальтидан тўп киритди. Ҳимоячини соф ҳужумчи сифатида ўйнатишни бошлаган Кумиков ўйиндан кейин буни “махфий қуролимиз” деб атаганди. Бу мураббий ҳам илк ғалабасидан кейиноқ клуб тарихига кирди.

анжан

19-тур. “Андижон” – “Пахтакор” – 1:0.

19-турга қадар “Пахтакор”ни Суперлигада ҳеч ким тўхтата олмаётганди, енгиш учун кучи етмаётганди-а? “Андижон” “Бобур арена”да чемпионни яққол аутсайдер сифатида қабул қилди. “Пахтакор” 48 очко билан 1-ўринда, мезбонлар эса 12 очко билан 14-поғонада эди. Кумиковнинг бу ўйинга қўллаган тактикаси ва футболчиларни қисқа муддат ичида ҳар томонлама тайёрлай олганига фақат қарсаклар чалиш мумкин. “Навбаҳор” ҳамда “Машъал” дарвозаларига гол уриб жамоасининг тарихий ғалабаларига катта ҳисса қўшган Усмонали Исмоналиев сариқ карточкалари тўрттага етгани сабабли муҳим учрашувни ўтказиб юборди. Виктор Балютович унинг ўрнига Фарҳод Соҳибжоновни ҳужумга қўйди. Унинг топқирлигидан кейин ушбу футболчи 25-дақиқада гол урди ва бу “Пахтакор”нинг мавсумдаги биринчи мағлубиятига замин яратиб берди. Шундай қилиб, “Андижон” Кумиков бошчилигида чемпионни мағлубиятга учратиб барча тахминларни йўққа чиқариб, сенсация кўрсатди.

андижон00

Эътибор бердингизми, “Андижон” тўртта ўйинида ҳам 1:0 ҳисобида ютган. Кутилмаган жойдаги ғалаба мезбонлар учун олти очколик аҳамият касб этди ва энди улар охирги ўриндан қутулиб 12-поғонага чиқиб олди. Гўёки, жамоа кимни қачон ва қаерда ютишни биладигандек. Ана энди, ғалабаларни энг саралари “Андижон”да эканига амин бўлдингизми?

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию