19 ёшли футболчи Европада катта рекорд ўрнатди

“Барселона” ярим ҳимоячиси Гави Испания чемпионатининг 4-турида “Осасуна”га қарши ўтказилган учрашувда қатнашиш орқали рекорд натижа қайд этди.

19 ёшли футболчи учун бу “Барселона” таркибидаги 100-учрашув сифатида қайд этилди.

Аҳамиятли томони шундаки, Гави Европанинг кучли бешлик чемпионатларида 100 та ўйинда майдонга тушган 2004 йил ва ундан кейин туғилган биринчи футболчи бўлди.

Бундан ташқари, Гави “Барселона” сафида 100 та ўйин ўтказган энг ёш футболчи номини ҳам қўлга киритди. У “Осасуна”га қарши ўйин вақтида 19 ёшу 32 кунлик эди. Аввалги рекорд Боян Кркичга тегишли бўлиб, бу ўйинчи каталонияликлар таркибида 100-маротаба майдонга тушганида 19 ёшу 84 кунлик бўлган.