200: Ronaldu yangi cho‘qqiga yaqinlashdi

Saudiya Arabistoni Professional ligasining 7-turida “An-Nasr” futbolchilari “Ash-Shabab” maydonidan 2:1 hisobidagi qiyin g‘alaba bilan qaytdi.

Riyodliklarga navbatdagi uch ochkoni keltirgan golga Krishtianu Ronaldu o‘yindagi to‘xtalishlar uchun qo‘shib berilgan vaqtning ettinchi daqiqasida penaltidan kiritdi.

Bu 39 yoshli hujumchining professional faoliyatidagi 907-gol sifatida qayd etildi.

E’tiborli jihati shundaki, portugaliyalik hujumchi faoliyatida 198-marotaba penaltini amalga oshirdi. Tez orada Ronaldu penalti tepish bo‘yicha ikkiyuzlik marrani zabt etadi.

Krishtianu 11 metrlik nuqtadan o‘zining 168-golini urdi. “An-Nasr”ga kelganidan buyon mohir to‘purar 19 marotaba penalti tepib, ularning barchasini aniq bajargan.