Арда Туран – ЕЧЛ 6-турининг энг яхши футболчиси

“Барселона”нинг турклиялик хавбеки Арда Туран ЕЧЛ 6-турининг энг яхши футболчиси деб топилди. Бу ҳақда УЕФА матбуот хизмати маълум қилди.

Туран “Боруссия М” клубига қарши (4:0) ўйинда хет-трик муаллифи бўлганди. Сўровномада овоз берганларнинг 58% айнан унинг номзодини қўллаб-қўллади.

“Бавария” ҳужумчиси Роберт Левандовски 17% билан иккинчи ўринга лойиқ бўлди. У “Атлетико” билан ўйинда ягона голи билан мюнхенликларга ғалаба келтирганди.

“Динамо Киев” аъзоси Андрей Ярмоленко 8% билан учинчи ўринни эгаллади. “Бешиктош”га қарши (6:0) учрашувда украиналик футболчи 1 та гол ва 3 та голли узатмага муаллифлик қилди.

Кейинги ўринларни мос равишда Карим Бензема (“Реал”), Андре Силва (“Порту”), Лукас Перес (“Арсенал”), Гонсало Игуаин (“Ювентус”) ва Харри Кейн (“Тоттенхэм”) эгаллади.