23 йил ва 7753 кун! Златан ўзининг илк голини киритганида дунё қандай кўринишда эди?

Ибра жароҳатидан фориғ бўлгач, «Милан» таркибида «Кальяри»га қарши баҳсда майдонга тушди. Қувонарлиси шундаки, 39 ёшли ҳужумчи ўзининг қайтишини иккита гол билан нишонлади. У А Сериянинг 8 та ўйинида 12 та гол киритди ва ҳали юқори савияда тўп суришга қодирлигини кўрсатиб қўйди. Златан «Кальяри» дарвозасига киритган голлари орқали, бир нечта рекордларни қайд этди.

- 2021 йилда иккита гол киритган ҳужумчи, қаторасига 23 йилдан бери профессионал футболда гол уришни уддаламоқда. Унинг голлар серияси 1999 йилда бошланганди.

- Златан клублар миқёсидаги учрашувларда 498 та гол киритган. Шунингдек, 61 та гол Швеция термаси либосида урилган.

- Ибрагимович ўзининг профессионал футболдаги илк голини бундан 7753 кун аввал нишонлаган. 1999 йилнинг 30 октябрь санасида 18 ёшли Златан «Мальме» сафида «Вестра Фрелунда» клуби дарвозасини ишғол этади. Қаҳрамонимиз ўзининг илк голини киритганда, футбол оламида қандай воқеалар содир бўлаётган эди? Бугун шу саволга атрофлича жавоб беришга уриниб кўрамиз.

1999 йил. Футбол оламидаги энг муҳим воқеалар

- Ибра ўзининг дебют голидан 5 ой аввал, «Манчестер Юнайтед» тарихий учрашувда «Бавария» устидан ғалаба қозонди ва ЕЧЛ бош совринига эга чиқди. Европа Чемпионлар лигаси тарихидаги энг ёдда қоларли баҳслардан бирида «қизил иблислар» Шерингем ва Сульшернинг голлари эвазига сўнгги сонияларда «Бавария»дан ғалабани илиб кетгани дарров кўз олдингизга келгани аниқ.

- Ўша даврларда даражаси ҳозирги Европа Лигасидан анча баланд бўлган УЕФА кубогида Италиянинг «Парма» клуби ғалаба қозонди. Верон, Буффон, Тюрам, Креспо ва Кьезани таркибда жамлаган жамоа турнир давомида йўлидан чиққан барча рақибларни «янчиб» ташлайди.

- Сўнгги бор ўтказилган «Кубок эгалари кубоги» турнирида Римнинг «Лацио» жамоаси чемпионликни қўлга киритади. Ўша даврлардаги «бургутлар»нинг таркибига бир эътибор қаратинг: Недвед, Салас, Манчини, Станкович, Неста, Вьери, Фернанду Коуто, Синиша Михайлович... Кейинроқ жамоа таркибни Диего Симеоне, Верон ва Симоне Инзаги билан янада кучайтириб олади. Монакода бўлиб ўтган УЕФА суперкубогида «Манчестер Юнайтед» мағлуб этилади.

- Киевнинг «Динамо»си Валерий Лобановский бошчилигида Европани остин-устун қилиб ташлайди. Клуб Европа Чемпионлар лигасининг ярим финалига қадар етиб келади. Шевченко эса, 8 та гол киритиб, турнир тўпурарига айланади. Кўп ўтмай, уни «Милан» каттагина сумма эвазига ўз сафига қўшиб олади.

- «Олтин тўп» «Барселона» билан «мўъжиза» кўрсатган Ривалдога берилди. Келажакда «Бунёдкор» жамоаси аъзоси бўлган бразилиялик футболчидан кейинги ўринларни Дэвид Бекхэм ва Андрей Шевченко эгаллади. Кучли ўнликка Батистута, Фигу, Рой Кин, Кристиан Вьери, Верон, Рауль ва Маттеус кирди.

- Кучли бешлик чемпионатларида «Манчестер Юнайтед», «Барселона», «Милан», «Бавария» ва «Бордо» клублари ғалаба қозонди.

- Златан ўзининг илк голини нишонлаётган пайтда Роналду 14 ёшли ўспирин эди. У «McDonald's»дагиларнинг чой-чақаси эвазига кун кўрар, «Спортинг» академиясининг оддий бир аъзоси эди. Лео Месси эса, 120 см бўйга эга 12 ёшли болакай бўлган. Киллиан Мбаппе эндигина 10 ойлик чақалоқ, Эрлинг Холанд Златаннинг илк голидан 9 ой ўтиб дунёга келади.

1999 йил. Ўзимизнинг футболдаги энг муҳим воқеалар

- Ибра ўзининг илк голини киритган йили Ўзбекистон чемпионатида «Дўстлик» (64) клуби бир очкога «Нефтчи»ни (63) ортда қолдиради ва финишга биринчи ўринда етиб келади. Ички биринчиликда «Нефтчи» аъзоси Умид Исоқов ва Бахтиёр Ҳамидуллаев 24 та гол билан тўпурарлар пойгасида ғалаба қозонади. Бронза медаллари эса, «Навбаҳор» клубига насиб этади. Тошкентнинг «Пахтакор» жамоаси 58 очко билан 4-поғонани эгаллайди.

- Бугунги кунда «Милан» шарафини ҳимоя қилаётган афсона ўзининг илк голини киритган пайтда, Ўзбекистон терма жамоаси постида Маҳмуд Раҳимов иш бошлаган эди. Бразилиялик Вейга да Силванинг ўрнини эгаллаган мураббий терма жамоа бошқарувида 6 та ўйин ўтказади ва барчасида ғалаба қозонади.

2000 йилнинг бошида эса, УФФ терма жамоани Виктор Борисовга топширади.  

- 1999 йилда Ўзбекистонда йилнинг энг яхши футболчиси сифатида «Пахтакор» аъзоси Андрей Акопянц эътироф этилади. Ундан кейинги ўринларни Шуҳрат Раҳмонқулов («Навбаҳор») ва Нўъмон Ҳасанов («Пахтакор») эгаллайди.