"4 та мағлубият - бу кўпайиб кетди" ёхуд "Янгиер" бош мураббийи про лигада сюрприз кўрсатаётган клуб, жамоасидаги асл вазият ва Суперлигага чиқадиган иштирокчини айтди

Про лиганинг бу йилги мавсуми кутилганидек анча шиддатли ва кескин курашларга бой ўтяпти. Бу ерда осонликча жон таслим қиладиган клублар йўқ, ҳисоби. Аксарият жамоалар таркибини кучайтиришга эришди.

Бу борада “Янгиер” клубини ҳам айтиб ўтиш керак. Чемпионатга тайёргарлик жараёнида селекцияда яхши ишлашди ва бир қатор Суперлигада ўйнаган футболчиларни олиб келишга эришишди. Лекин яхши таркибга эга бўлган “Янгиер” клуби 5 та турда битта ғалаба ва тўртта мағлубият қайд этди.

Олдинда клубни Ўзбекистон Кубоги гуруҳ босқичининг илк турида “Андижон”га қарши учрашув кутяпти. Бўлажак баҳс олдидан Sports.uz мухбири “Янгиер” бош мураббийи Бекзод Қодирқулов билан суҳбатлашди.

- “Янгиер” жамоасининг Ўзбекистон кубогида ўз олдига қўйган вазифаси қандай ёки бор эътиборини чемпионатга қаратганми?

- Биз буниси чемпионат, буниси кубок, деб ажратиб ўтирмаймиз. Барчасига бирдек муносабатда бўламиз. Кубокда биринчи ўйинни ўз уйимизда мухлисларимиз олдида “Андижон”га қарши ўтказамиз. Ушбу учрашувда ғалаба қозониб, ишқибозларимизни хурсанд қилишга ҳаракат қиламиз. Чемпионатдаги тўртта мағлубиятдан кейин футболчиларимиз бироз тушкун кайфиятда. Шунинг учун улар билан руҳий жиҳатдан кўпроқ гаплашяпмиз. “Андижон” билан учрашувда майдонга ғалаба учун чиқамиз.

- Ўзбекистон Кубогида “Янгиер” қандай вазифа учун курашади?

- Асосий вазифамиз гуруҳдан чиқиш. “Андижон” ва “Арал Самали” билан бўладиган учрашувларда бор кучимизни сарфлаймиз. “Сўғдиёна” эса ОФК кубогида қатнашади. Бу жамоага қарши майдонга тушиш бизга мотивация беради. Умумий олиб қараганда, гуруҳдан чиқишимиз учун бизда имконият бор.

- “Янгиер” про лиганинг дастлабки турида ғалаба қозонганди. Аммо кейинги тўртта турда кетма-кет мағлубиятга учраяпти. Бу нима билан боғлиқ?

- Шу нарсани биз ҳам таҳлил қиляпмиз. Кўпроқ ўйинлар чоғида вазиятлардан фойдалана олмаётганимиз ҳам бизга панд беряпти. Ҳар бир учрашувда 3-4 тадан голли имкониятларимиз бўляпти. Шулардан фойдалана олмаётганимиз учун мағлубиятга учраяпмиз. Бунинг сабабини шу билан изоҳлаган бўлардим. Футболчиларимиз тажрибали, бундай вазиятдан чиқиб кета оламиз.

- Айнан таркиб хусусида сўрамоқчи эдим. Суперлигада тўп сурган ўйинчиларни жамоага олиб келдингиз. Нима, улар кутилган даражада жамоага ёрдам бера олмаяптиларми?

- Футболчиларимиз қўлдан келганича ҳаракат қилишяпти. Айтяпман-ку, вазиятлардан фойдана олмаяпмиз. Бизга гол етишмаяпти. Гол ура олмасак, рақибларимизни юта олмаймиз. Бироқ имкониятларни йўққа чиқараётганимиз жамоага таъсир ўтказмаслиги керак. Машғулотларда шунинг устида ҳам иш олиб боряпмиз. Юқорида айтдим, руҳий томондан ҳам ишлаяпмиз. “Андижон” билан ўйнаганмиз. Бу жамоани “Ғиждувон” билан ўйинини кўриб чиқамиз ва таҳлил қиламиз. 8 апрель куни максимал даражада тайёрланамиз.

- Чемпионатдаги тўртта мағлубиятдан кейин орада Кубок баҳслари ўтказилади. Балки бу ҳолат жамоангизга қандай ёрдам бериши мумкин?

- Агар битта ютиб олсак, йигитларнинг руҳияти ҳам кўтарилади. Кубокдаги ўйинларимиз чемпионатга ҳам тайёргарлик вазифасини ўтаб беради. Агар биз гуруҳда иккита учрашувда ютадиган бўлсак, кейинги босқичга чиқамиз ва бу жамоамизга мотивация ҳам беради. Натижада чемпионатга бошқача руҳда кириб борамиз.

- “Янгиер”нинг таркибини кўриб кўп нарса кутгандик. Турнир жадвалида эса жамоангиз 9-ўринда. Шундан келиб чиқиб айтадиган бўлсак, энди клубингиз жон сақлаб қолиш учун курашадими ёки...

- Юқори ўринлар учун максимал равишда охиригача курашамиз. Бундан кейин ҳам ҳар бир учрашувда ғалаба учун ҳаракат қиламиз. Буни ўйинчиларимиз ҳам жуда яхши тушуниб туришибди. Ўйин давомида тўпни ўзимизда назорат қилиш ва имкониятларни юзага келтиришда фаоллигимиз бор. Менимча, бир-иккита ғалабадан кейин иккинчи даврада ишларимиз жойига тушиб кетади. Ҳозирги омадсизлигимиз вақтинчалик. Аммо тўртта мағлубият – бу бироз кўпайиб кетди. Балки Кубокдаги ғалабаларимиз чемпионатда яхши тарафдан фойда бериши мумкин.

- Про лиганинг бу йилги савияси қандай? Ўтган йилгидан кўра қандай фарқи бор?

- Ўз-ўзидан кўриниб турибди, Суперлигадан учта жамоа про лигага тушди. Шунинг ҳисобига про лиганинг савияси кучайди. Ўтган йилгига қараганда, 50 фоизга даража ортди. Энди ғалаба қозониш осон бўлмаяпти. Бир очко учун ҳам жуда жиддий кураш кечяпти. Бу йил Суперлигага ким чиқишини билиб бўлмайди.

- Про лигада сиз учун сюрприз кўрсатаётган клуб қайси?

- “Хоразм” яхши старт олди. Фақат шуни айта оламан. Қолган лидер клублар ҳам ҳаракат қиляпти. “Хоразм” бундай даражани охиригача давом эттирадими-йўқми, билмадим. Буни вақт кўрсатади. Лекин ҳозирги кўрсатаётган ўйинлари яхши. “Андижон” ҳам Суперлига вазифасини қўйган. Ўзида керакли очколарни йиғиб боряпти. Легионер ва тажрибали ўйинчиларига эга. Менимча, улар ўз мақсадига эришади.