Кутилмаган хулоса: Ўзбекистоннинг жисмоний ҳолати кўп жамоалардан устун!
АҚШ, Канада ҳамда Мексика ўзаро ҳамкорликда мезбонлик қилаётган футбол бўйича жаҳон чемпионати бутун дунёдаги ишқибозларнинг эътиборини ўзига қаратмоқда.
Шу билан бирга футбол экспертлари, мураббийлар, футболчилар, мутахассислар мундиалда қатнашаётгаг 48 мамлакат миллий терма жамоаси ва ўйинчиларининг имкониятларини баҳолаб, ўз фикр-мулоҳазаларини билдиряпти.
Хусусан, Марказий Осиё ва МДҲ ҳудудидаги аксарият мамлакатлар вакиллари 2026 йилги жаҳон чемпионатида ўз тарихида илк бор мундиалда қатнашаётган Ўзбекистон миллий терма жамоасига мухлислик қиляпти.
Хусусан, Россия миллий терма жамоасида ўйнаган машҳур футболчи Денис Глушаков ўзбек футболчиларининг тайёргарлигини юқори баҳолади.
- Энг қизиғи, Фабио Каннаваро уларга қандай ўйин услубини сингдиришидир. Ўзбекистон терма жамоасида ёшлар кўпроқ ва улар жисмоний жиҳатдан кўплаб рақиб терма жамоаларга нисбатан яхшироқ тайёргарликка эга, деб ҳисоблайман.
Иқлим шароити ҳам улар учун одатий. Одил Аҳмедов билан ёзишиб турдик, у ҳам жамоа жаҳон чемпионатига тайёр эканини таъкидлади, — деди Денис Глушаков.
Ўзбекистон тарихида илк бор жаҳон чемпионатида иштирок этаётгани боис, футбол жамоатчилиги ҳали бу терма жамоанинг имкониятларини яхши билмайди.
Ўтган йил октябрь ойида Ўзбекистон миллий жамоасига италиялик мутахассис Фабио Каннаваро бош мураббий этиб тайинланган эди.
Эътиборли жиҳати шундаки, бундан йигирма йил муқаддам Фабио Каннаваро Италия терма жамоаси сардори сифатида 2026 йилги жаҳон чемпионатида ғолиб чиққан ва ўша йили футболчиларнинг энг нуфузли индивидуал соврини "Олтин тўп"ни қўлга киритган эди.
Бу гал Каннаваро ўз фаолиятида илк бор мундиалда бош мураббий сифатида иштирок этмоқда.
Унинг шогирдлари гуруҳ босқичида Луис Диас ва Хамс Родригес бошчилигидаги Колумбия, Криштиану Роналду ва Бруну Фернандеш етакчилигидаги Португалия ва жисмонан бақувват футболчилардан таркиб топган Конго Демократик Республикаси терма жамоаларига қарши майдонга тушади.
Ўзбекистон миллий терма жамоаси жаҳон чемпионатидаги илк учрашувини 18 июнь куни Тошкент вақти билан соат 7:00 да Мексиканинг "Ацтека" стадионида Колумбия терма жамоасига қарши ўтказади.
23 июнь куни иккинчи турда Фабио Каннаваро шогирдлари чемпионат фаворитларидан ҳисобланган Португалия футболчилари билан рақобатлашади.
Гуруҳдаги охирги учрашув 28 июнь куни Конго Демократик Республикаси вакиллари билан бўлиб ўтади.
Фикрлар