АҚШ нега мундиал олдидан ўзбекистонликларнинг кўпига виза бермади?
Ўзбекистон 2026 йилги жаҳон чемпионати олдидан АҚШ визасини олишда энг кўп рад жавоб олган 11 мамлакат қаторига кирди, дея хабар BBC ўз манбалари маълумотларига таяниб.
АҚШ Давлат департаменти очиқ маълумотлари таҳлилига кўра, ўзбекистонликлар учун B1/B2 тоифасидаги визалар (саёҳат ва хизмат сафари учун, футбол мухлислари учун тавсия этиладиган виза тури) бўйича рад этиш кўрсаткичи 50 фоиздан ошиб кетган.
Ҳозирда бу кўрсаткич тахминан 52–53 фоизни ташкил этмоқда. Бошқача айтганда, АҚШ стадионларида миллий терма жамоани қўллаб-қувватлашни режалаштирган ҳар иккинчи ўзбекистонлик мухлис виза ололмаган.
Ўзбекистондан ташқари, рад этиш даражаси 40 фоиздан юқори бўлган яна 10 давлат “қора рўйхат”дан жой олган. Уларнинг барчаси 48 та жамоа иштирок этадиган жаҳон чемпионатининг финал босқичига йўл олган.
Энг мураккаб вазият Сенегал терма жамоаси мухлисларида кузатилмоқда — бу мамлакат фуқароларига виза рад этиш кўрсаткичи 70 фоиздан ошган.
Шунингдек, Гана ва жаҳон чемпионатида Ўзбекистон билан бир гуруҳдан жой олган Конго Демократик Республикаси фуқаролари ҳам АҚШ визасини олишда жиддий қийинчиликка дуч келмоқда.
Эслатиб ўтамиз, Ўзбекистон миллий терма жамоаси ўз тарихида илк бор жаҳон чемпионати финал босқичига йўл олди ва мусобақада Марказий Осиёнинг ягона вакилига айланди.
Қуръа натижасига кўра, Ўзбекистон “K” гуруҳига тушди, унда Португалия, Колумбия ва юқорида номи кельтирилган Конго Демократик Республикаси терма жамоалари ҳам иштирок этади. Ўзбекистон терма жамоасининг дебют учрашуви 18 июнь куни Тошкент вақти билан соат 7:00 да Мехико шаҳридаги “Ацтека” стадионида Колумбияга қарши ўйин билан бошланади.
Мана шу учрашув жаҳон чемпионати учрашувлари орасида энг кўп чипта сотилган ўйин сифатида мундиал рекордини ўрнатди.
Фикрлар