7:0, 7:1, 1:6..."Paxtakor" xokkeycha hisoblarda yutishni yaxshi ko‘radi yoxud "Loko"ning dahshatli mag‘lubiyatlari

Xabaringiz bor, bugun Superliganing 12-tur uchrashuvlariga start berildi. Turning markaziy o‘yinlaridan biri 4 iyul, yakshanba kuni o‘tkaziladi. Amaldagi chempion – “Paxtakor” o‘z maydonida “Lokomotiv”ni qabul qiladi. Bir tomondan qaraganda, bu Toshkent derbisi deb nomlanadi. Ammo bu jamoalar ishtirokidagi o‘yin odatda muhim ahamiyat kasb etib kelgan. Klublarning navbatdagi to‘qnashuvi ham bundan mustasno emas.

Piter Xyuistra boshchiligidagi “Paxtakor” hozirga qadar o‘tkazilgan 11 ta o‘yinning 9 tasida g‘alaba qozondi va 2 ta uchrashuvda durang qayd etdi. Mag‘lubiyatsiz odimlayotgan “sherlar” 29 ochko bilan yakka peshqadamlikni o‘zida saqlab kelyapti. Yakshanba kuni “Paxtakor”ning raqibiga aylanadigan “Lokomotiv” esa, hozircha chempiondan ancha orqada. Aniqrog‘i, temiryo‘lchilar 15 ochko jamg‘arib, musobaqa jadvalida 8-o‘rinda boryapti. Ko‘rinib turibdiki, “Loko” “Paxtakor”dan 14 ochkoga ortda qolyapti. Biroq jamoalar o‘rtasida bu farq maydondagi o‘yinga aslo ta’sir o‘tkaza olmaydi. Chunki yuqorida aytdik, bu derbi va turning markaziy o‘yini.

Shu o‘rinda, “Paxtakor” – “Lokomotiv” klublari ishtirokidagi o‘yinlar tarixi ham o‘ziga yarasha qiziqligini aytish joiz. Shu paytga qadar mazkur jamoalar chempionat doirasida 35 marta maydonda kuch sinashgan. Bunday to‘qnashuvlarda jamoalarning g‘alabaga chanqoqligi va o‘yinlarning hujumkor ruhda o‘tishi sababli golsiz uchrashuvlar kam bo‘lgan. 35 bellashuvdagi qarama-qarshilikning  faqatgina ikkitasida darvozalar daxlsiz qolgan – 0:0. Qolgan barcha o‘yinlarda gollar bor.

E’tiboringizni qiziq bir jihatga qaratmoqchimiz. Faqat undan avval, klublarning statistikasiga to‘xtalib o‘tsak. Boya aytdik, 4 iyul kuni bo‘ladigan o‘yin “Paxtakor” – “Lokomotiv” ishtirokidagi 36-to‘qnashuvga aylanadi. Baribir ustunlik “Paxtakor” tomonida, buni katta ustunlik desa ham bo‘ladi. Boisi, “sherlar” bu raqibini 35 ta o‘yinning 20 tasida mag‘lubiyatga uchratishga erishgan. Ha, “Lokomotiv” ham “Paxtakor”ni yutgan, faqat 7 marta. “Temiryo‘lchilar” oxirgi marta chempionni 2018 yilgi mavsumda mag‘lub etgan, o‘shanda 3:2 hisobi qayd etilgan. Shuningdek, 8 ta uchrashuvda kuchlar teng kelgan. To‘plar nisbati ham shunga mos – 73:35.

Endi yuqorida aytib o‘tganimizdek, jamoalarning o‘zaro o‘yinlardagi qiziq jihatga e’tiboringizni tortmoqchimiz. Bu klublar o‘rtasidagi o‘yinlarni gollarsiz tasavvur qilish qiyin. O‘tgan mavsumda “Paxtakor” maydonidagi o‘yin yodingizdami? 2020 yilning 24 avgust kuni bo‘lib o‘tgan bahsda “Lokomotiv” darvozasiga gollar yomg‘iri yog‘dirilgandi. “Paxtakor” raqib darvozasiga javobsiz naqd 7 ta gol urgan! O‘sha uchrashuvda Dragan Cheran, Doston Hamdamov, Jaloliddin Masharipov hamda Igor Sergeev bilan Eren Derdiyokning dubllari “Lokomotiv”ning sharmandali mag‘lubiyatini ta’minlagan.

Lekin o‘zaro o‘yinlardagi bunday yirik hisobdagi mag‘lubiyat “Lokomotiv” uchun birinchisi emasdi. Agar o‘yinlar tarixiga nazar tashlasak, “temiryo‘lchilar”ning yana boshqa yirik hisobdagi mag‘lubiyatlari bor. 2006 yilgi mavsumda ham xokkeycha hisob kuzatilgan. “Paxtakor” o‘z maydonida “Lokomotiv”ni 7:1 hisobida tor-mor keltirgan. Bu ro‘yxatda yana qanday natijalar borligini bilasizmi? 2004 yilda “Lokomotiv” o‘z maydonida “Paxtakor”dan javobsiz to‘rtta gol o‘tkazib yuborgan. Bir yildan keyin “Paxtakor”ning maydonida o‘tkazilgan bellashuvda esa 5:1 hisobidagi yirik g‘alaba qo‘lga kiritilgan. Darvoqe, o‘sha yilning birinchi davrasida “Lokomotiv” maydonida tashkillashtirilgan o‘yinda ham “Paxtakor” o‘ta yirik natija bilan g‘alaba qozongan – 1:6.

2006 yilgi 7:1 dan keyin 2007 yilda ham “Paxtakor”ning yana yirik g‘alabasiga guvoh bo‘lingan. Bu safar “Loko” darvozasiga javobsiz to‘rtta gol urilgan. E’tiborlisi, bu klublar ishtirokidagi o‘yinlarda to 2015 yilga qadar yirik hisoblar kuzatilmagan. Goh u, goh bu jamoa g‘alaba qozongan va gollar orasidagi tafovut katta bo‘lmagan. 2015 yilning 8 mart kuni yangi mavsum boshlanishi oldidan “Lokomotiv” – “Paxtakor” ishtirokida Superkubok o‘yini o‘tkazilgan. O‘sha uchrashuvda “Loko” futbolchilari raqibini 4:0 hisobida mag‘lub etdi. E’tiborlisi, o‘sha muvaffaqiyat o‘zaro o‘yinlarda “Lokomotiv”ning yagona yirik hisobdagi g‘alabasi bo‘lib turibdi.

Xullas, shunaqa gaplar. “Paxtakor” “Lokomotiv”ga qarshi uchrashuvlarda yirik hisoblarda yutishni yaxshi ko‘radi. Katta ehtimol bilan navbatdagi 36-to‘qnashuvda ham gollarga boy o‘yinni ko‘rsak kerak. Xyuistra va Sekeyra qarama-qarshiligini kuzatish juda qiziq tuyulyapti. Chunki bu uchrashuv “Loko”ning portugaliyalik ustozi uchun “Paxtakor”ga qarshi birinchi o‘yini hisoblanadi. Balki siz Sekeyraning “Paxtakor”ga syurpriz tayyorlab qo‘yganiga ishonasizmi? Bu murabbiyga jamoasining oldingi yillardagi xokkeycha hisobdagi mag‘lubiyatlari ta’sir qilmasligi turgan gap, ammo buni u xayolining bir chetida eslab qolsa ajab emas. Shuning evaziga balki “Lokomotiv”ni “Paxtakor”ga qarshi jangovor ruhda tayyorlay olar va biz “Loko”ning eng yaxshi o‘yinini ko‘ramizmi?