Дзюдо. 3 полвонимиздан фақат Шарофиддин Болтабоев олға кетмоқда

Хорватиянинг Загреб шаҳрида дзюдо бўйича Гран-при сериясига кирувчи мусобақанинг иккинчи кун беллашувлари давом этмоқда. Бугун эркаклар ўртасида 73 ва 81 кггача бўлган спортчилар баҳсида 3 нафар дзюдочимиз баҳсларни бошлашганди. 

Афсуски, 73 килограммгача вазн тоифасида курашган вакилларимиз мусобақа билан эрта хайрлашишди. Ғиёсжон Бобоев иккинчи даврада украиналик Артём Хомула тўсиғидан ўта олмаган бўлса, Ҳикматилло Тўраев чорак финал остонасида швециялик Томми Масиасга имкониятни бой бериб қўйди. 

81 килограммгача бўлган вазн тоифасида кураш олиб бораётган Шарофиддин Болтабоевгина мусобақадан чиқиб кетгани йўқ. Бироздан сўнг ушбу вакилимиз грециялик Алексис Нтанадсиди билан чорак финал йўлланмаси учун курашади.