ЕЧЛ қуръаси: кимга осон, кимга қийин? (Эркин Ғайбуллаев блоги)

Чемпионлар Лигасининг нимчорак финалига қуръа ташланиб бўлинди ва февраль ойининг иккинчи ҳафтасида дастлабки учрашувлар ўтказилиши режалаштирилган. Қуръа бизга бир-биридан қизиқарли жуфтликларни тақдим қилди. Аммо кимларгадир осон, кимгадир қийин рақибни туҳфа қилди. Хўш, бу сафарги қуръа натижалари бўйича кимга фойда, кимга зарар. Дастлбки хулосалар билан ўртоқлашамиз.

Ғолиб: Лерой Сане ва «Манчестер Сити»

Лерой Сане жорий мавсумни турли хил спорт формасида бошлади. Унинг Ёахим Лёв томонидан Жаҳон Чемпионатига борган таркибдан тушиб қолиш ёзда жиддий таъсир қилган кўринади. Унинг тушкунлиги клубдаги фаолиятига ҳам ўз таъсирини ўтказмай қолмади. Бироқ вингер яна қаддини ростлади, қаттиқ меҳнат қилиши ортидан Пеп Гвардиола жамоасининг муҳим фигурасига қайта айланиб олди. Энди эса у ўзи тарбия топган “Шальке”га қарши нимчорак финалида ўзини кўрсатишга уриниб кўради.

Сане сўнгги ҳафталарда голлари ва узатмалари сонини кескин ошириб олди. Бу билан у «шаҳарликлар»нинг энг самарали футболчисига айланди. Серхио Агуэро, Кевин де Брюйне, Давид Сильва ва Раҳим Стэрлинглар билан бирга Сане немис клубини жиддий синовдан ўтказади.

Гвардиоланинг эса кўп жиҳатдан омади чопди. Гуруҳ босқичида «Шахтёр», «Лион» ва «Хоффенхайм» каби ўртамиёна клубларга қарши ўз тактик ишланмаларини анча сайқаллаб олди. Унда муҳим паллаларга киришдан олдин нисбатан осонроқ рақиб тушгани жамоаси спорт формасини янада кучайтириб олиши учун навбатдаги имконият.

Ғолиб: «Реал» ва «Барселона»

Айни вақтда «Реал» учун оғир дамлар кечмоқда. Роналду, Зидан йўқ! Хулен Лопетеги истеъфога чиқарилди. Бироқ улар ҳамон Чемпионлар Лигасида жон сақламоқда. Бу уларнинг хусусий мусобақасига айланиб улгурди, десак муболаға бўлмайди. Фақатгина мадридликларнинг «ЦСКА»га қарши сўнгги турда йирик ҳисобда мағлуб бўлиши дилни хира қиладиган вазият бўлди.

Аммо уларнинг нимчорак финалда «Аякс»га қарши тўқнаш келиши вазиятни юмшатмоқда. Голландияликлар гуруҳ босқичини аъло кайфиятда якунлашди. Ўз сафида дунёнинг ёш истеъдодлари – Френки Де Йонг ва «тилла бола» Маттейс Де Лигтга эгалиги уларда ҳам имконият сақланиб қолганини оширади, холос.

Бироқ «Реал» бу «Реал». «Сантьяго Бернабеу»га ЕЧЛ доирасида ташриф буюрадиганлар анча ҳадиксираб келишади.

«Барселона»да ҳам шундай вазият. Каталонияликлар гуруҳ босқичида «Тоттенхэм», «Интер» ва «ПСВ» каби жамоаларни жиддий имтихондан ўтказди. «Лион»га қарши баҳс ҳам уларни қўрқита олмайди. Бруно Женезионинг шогирдлари Гвардиоланинг «Манчестер Сити»сини ўз уйида мағлуб этган бўлсада, Месси бошчилигидаги «Барселона»ни мағлуб этиш умуман бошқа-бошқа масала. Француз клубига қуръа умуман ёқмагани аниқ.

Мағлуб: «Ливерпуль»

Ўтган сафар қуръа «қизиллар»га кулиб боққанди. Осон гуруҳдан чиққан мерсисайдликлар «Порту»га қарши ўйинда истаган услубда истаганча гол уришганди. Фақатгина чорак финалдан бошлаб Юрген Клопп жамоаси ўзининг нималарга қодирлигини кўрсата бошлаганди.

Бу сафар уларга осон бўлмади. «Ливерпуль» гуруҳ босқичида уч марта мағлубият аламини тотиб кўрди. Уччала сафар ўйинида Клопп ютқазди. Нимчорак финалда эса улар «Бавария»га қарши кураш олиб боради. «Ливерпуль» ўзига анча ишонган жамоа ҳисобланади, аммо «ПСЖ» ва «Наполи»га қарши учрашувларда «қизиллар»нинг иштахаси карнай эмаслиги сезилиб қолди.

Боз устига улар курашни дунёнинг энг яхши ҳимоячиларидан бири Виргиль Ван Дейксиз бошлайди. Голландиялик ҳимоячининг дисквалификацияси борлиги сабаб у жамоасига ёрдам беролмайди. Агарда уларга жароҳатлар гирдоби ўралашиб қолса Роберт Левандовски осонликча жазолаши муқаррар.

Мағлуб: «Ювентус»

«Атлетико»га қарши «жанг қилиш» навбати энди «Ювентус»га насиб қилди. Гуруҳ босқичида «МЮ», «Валенсия» ва «Янг Бойс» тўсиғидан осонликча ўтган итальян клуби нимчорак финалда анча тер тўкишига тўғри келади.

«Кекса синьора» ўтган мавсумда «Реал»дан таслим бўлиб мусобақани тарк этганидан кейин мадридликларнинг юлдузи Роналдуни ўзига олиб келди. Албатта, «Юве» «Атлетико»га қарши ўйинда дурангдан яхшироқ натижа кутишмоқда. Аммо Симеоне қўли остидаги жамоа дунёнинг ҳар қандай клубига муносиб қаршилик қила олади.

Камига улар ўз уй стадиони – «Ванда Метрополитано»да ўтадиган ЕЧЛ финалида иштирок этишни жуда-жуда истайди.