Гонсало Игуаин икки ўйинга дисквалификация қилинди

Италиянинг "Милан" клуби ҳужумчиси Гонсало Игуаин А Серия 12-турида "Ювентус"га қарши ўйиндаги қилиғи туфайли жамоасининг бўлажак икки учрашувини ўтказиб юборади.

Бундан ташқари аргентиналик форвард Лига раҳбариятидан огоҳлантирув хати ҳам олди. Игуаин сариқ карточкадан сўнг бош ҳакам Паоло Маццоленига бақиргани учун майдондан четлатилган эди.

Игуаин майдонни тарк этишдан бош тортган ва Криштиану Роналду билан ҳам тортишувга киришган эди. Гонсало янада кўпроқ ўйинга четлатилиши мумкин эди, аммо Роналдунинг ўзи орада ҳеч қандай ноўрин сўзлар айтилмаганлигини таъкидлади.

Энди "Милан" ҳужумчиси жамоасининг "Лацио" ва "Парма"га қарши учрашувларини ўтказиб юборади.