ЖЧ–2018га чақирилмаган Найнгголан Бельгия термасидан юз ўгирди

“Рома” клуби ва Бельгия терма жамоаси ярим ҳимоячиси Ража Найнгголан Россияда бўлиб ўтадиган ЖЧ–2018 турнирига чақирилмаганидан кейин Бельгия термасига бошқа қайтмасликка қарор қилганини айтди.

Бельгия терма жамоаси бош мураббийи Роберто Мартинес маҳоратли футболчини ЖЧ–2018нинг ҳатто кенгайтирилган таркибига киритмаган эди.  

“Терма жамоада эмаслигимдан афсусдаман. Телевизор орқали ЖЧ–2018 рекламасини кўриш мен учун оғир, чунки мен терма билан бирга эмасман. Бироқ бундан яхши вазиятларни ҳам кўришга ҳаракат қиляпман – менда дам олиш учун ортиқча 4 ҳафта бўлади.

Мартинес Римда олдимга келганида, у мени терма жамоага олмаслик учун сабаб қидираётганини тушуниб етганман. У менга зўр ўйинчи эканимни айтди, лекин фақатгина “Рома”да, Бельгияга менинг фойдам тегмаслигини маълум қилди.

Роберто якуний қарор қабул қилмаганини айтганди, аммо мен ҳаммасини тушунгандим. Мен Бельгия термасига бошқа қайтиб бормайман. Бу менинг якуний қарорим”, – деди аламзадаги Найнгголан.