Jamshid Iskanderov: “Lokomotiv"dagi o‘yinim orqali terma jamoaga qaytmoqchiman

“Paxtakor” bilan shartnomam yakunlangandi. Keyinchalik menga “Lokomotiv”dan taklif bo‘ldi. Buni o‘rganib chiqdim va biz kelishuvga erishdik. “Lokomotiv” safida Osiyo chempionlar ligasida, O‘zbekiston chempionatida ajoyib o‘yinlar ko‘rsatib, jamoadoshlarimni, klub rahbariyatini mehrini qozonishni istayman.

“Paxtakor” jamoasi tarkibida bir qancha vaqt davomida zaxirada qolib ketdim. “Lokomotiv”da yaxshi o‘yin ko‘rsatib, milliy termaga loyiq ekanligimni ko‘rsatmoqchiman. “Lokomotiv” tarkibida chiroyli g‘alabalar qo‘lga kiritishga va bunda jamoadoshlarimga yordam berishga qattiq harakat qilaman.

“Lokomotiv”dagilar meni yaxshi kutib olishdi. Bu erdagi kollektiv ajoyib ekan. Ushbu klubdagi barcha futbolchilar bilan ancha vaqtdan buyon tanishman, ular mening akalarim, ukalarim, do‘stlarim. Shu boisdan bu erga moslashib ketish qiyin bo‘lmaydi deb umid qilaman", - dedi Iskanderov klub rasmiy saytiga bergan intervyusida.