Жаъфар Ирисметов: Азиз Турғунбоев "Пахтакор" билан ўзи хоҳлаб шартнома имзолаган

Шу кунларда ўзбек футболи диққат марказида бўлиб турган Азиз Турғунбоев масаласи кўпчиликда турлича фикр уйғотмоқда. Айримлар уни "Пахтакор" ўйинчиси деб айтса, бошқалар "Навбаҳор"да ўйнаши керак дейишмоқда. 

"Пахтакор" клуби спорт директори Жаъфар Ирисметов SPORTS.uz муҳбири билан бўлган суҳбат давомида ушбу масалада ўз фикрини билдириб ўтди.

- Навбатдаги саволим Азиз Турғунбоев масаласи билан боғлиқ. Ўйлашимча, бу ҳаммани қизиқтиряпти. Яқинда “Пахтакор” ОЧЛнинг қайдномаси учун футболчилар рўйхатини эълон қилди ва унда Азиз Турғунбоев ҳам бор эди. Лекин у “Навбаҳор” билан ҳам шартнома имзолаган ва ҳозирда наманганликлар билан Қримда шуғулланиб юрибди. Ушбу масалага ойдинлик киритиб ўтсангиз?

- Азиз Турғунбоев билан ҳаққоний тарзда шартнома тузганмиз. Яъни, барча қонун-қоидаларга зид бўлмаган равишда ўзаро келишган ҳолда шартнома имзолаганмиз. Шундай экан, Азиз “Пахтакор”нинг футболчиси ҳисобланади. Тўғри, у айни пайтда “Навбаҳор” жамоаси билан шуғулланяпти. Терма жамоанинг лагеридан тўғри Қримга учиб кетган. Лекин биз футболчини қайтариш масаласида ПФЛга мурожаат қилганмиз. Бемалол айтишим мумкинки, биз уни ҳаққоний равишда ПФЛнинг рўйхатидан ўтказиб Осиё Чемпионлар лигаси учун “заявка” қилганмиз. Албатта, бу вазиятда футболчининг хоҳишига ҳам қаралади. Аммо биз Турғунбоев билан шартнома тузаётганимизда унинг жамоамизда ўйнаш учун хоҳиши бор эди. Ҳозир ҳам футболчининг “Пахтакор”да тўп суришга хоҳиши бўлиши керак. Яна нима дейишим мумкин? Азиз аввало “Пахтакор”га келиб машғулотларга қўшилиши лозим. Шундан кейингина агар унинг ўзи кетишни истаса, “Навбаҳор” билан музокараларга киришишимиз керак бўлади. Бироқ қонун бўйича Турғунбоев “Пахтакор”га қўшилиши шарт.

Суҳбатнинг тўлиқ матнини тез орада сайтимиз орқали ўқишингиз мумкин.