Бугун Намангандаги “Марказий” ўйингоҳда Наманганнинг “Навбаҳор” клубининг асосий ва ёшлар жамоалари футболчилари 2 таркибга бўлиниб, аралаш ҳолда, ўзаро ўйин ўтказишди.
Ушбу ўйинда мураббийлар штаби футболчиларнинг жисмоний ҳолатлари ҳамда ёш ўйинчиларни синовдан ўтказишга эътибор қаратганлиги боис, черногориялик ҳужумчи Дарко Никач 1-бўлимда “қизиллар”, 2-бўлимда эса “оқлар” таркибида ҳаракат қилди.
Таъкидлаш жоизки, учрашув анча қизиқарли ва курашларга бой тарзда кечди. Боиси, футболчилар россиялик мутахассис Андрей Канчельскисга ўзларининг энг яхши жиҳатларини намоён этишга ҳаракат қилишди.
Баҳснинг биринчи бўлимида “Навбаҳор” ёшлар жамоаси ҳужумчиси Акмал Турғунбоев ҳисобни очди ва жамоалар танаффусга 1:0 ҳисобида чиқиб кетишди.
Иккинчи бўлимда ўйин анча шиддатли тарзда кечиб, дарвозаларга яна 3 та гол урилди. “Қизиллар”дан захирадан майдонга туширилган ёшлар жамоамиз ярим ҳимоячиси Шоҳруҳмирзо Аҳмадалиев ҳамда тажрибали ҳимоячи Жаҳонгир Меҳмонов дарвозани аниқ нишонга олишган бўлса, “оқлар”нинг голига 2-бўлимда жамоасини алиштирган черногориялик форвард Дарко Никач муаллифлик қилди. Ўз навбатида Жаҳонгир Меҳмоновнинг жарима зарбасини ажойиб тарзда амалга ошириб, Дилшод Ҳамроев қўриқлаётган дарвозани аниқ нишонга олганлигини ҳам эътироф этиш жоиз.
Шу тариқа мазкур учрашув орқали “Навбаҳор” мураббийлар штаби футболчиларнинг жисмоний ҳолатлари ҳамда ёшлар жамоаси вакилларини синовдан ўтказиб олишди.
“Қизиллар” – “Оқлар” – 3:1 (1:0)
13 октябрь. Наманган. “Марказий” ўйингоҳ. 287 томошабин.
Ҳакамлар: Ғайрат Жўраев, Денис Нехочин, Иброҳим Исмоилов.
Голлар: Акмал Турғунбоев, Шоҳруҳмирзо Аҳмадалиев, Жаҳонгир Меҳмонов – Дарко Никач.
“Қизиллар”: Исроил Обиджонов, Жаҳонгир Меҳмонов, Жавоҳир Олимжонов, Игорь Голбан, Аюбхон Номонов, Ҳожиакбар Юнусов, Аҳмад Мамадалиев, Абдулазиз Нишонбоев, Ойбек Мирзоҳидов, Дарко Никач, Акмал Турғунбоев.
Захирадан майдонга тушганлар: Шоҳруҳмирзо Аҳмадалиев, Юнусбек Абдувоҳидов.
“Оқлар”: Дилшод Ҳамроев, Дарко Станоевич, Музаффар Абдуллаев, Томислав Пайович, Шаҳзодбек Ҳамидов, Дилшод Жабборов, Билолхон Тошмирзаев, Абдурашид Валихонов, Азизбек Турғунбоев, Рўзимбой Аҳмедов, Сардор Сулаймонов.
Захирадан майдонга тушган: Дарко Никач.
Фикрлар