Бугун Осиё кубоги гуруҳ босқичининг сўнгги тур учрашувлари ўз ниҳоясига етди. Бугунги ўйинлардан сўнг нимчорак финалда тўп сурадиган барча терма жамоалар номи ҳам маълум бўлди.

Таъкидлаш керакки, бугун Ўзбекистон терма жамоаси Японияга имкониятни бой берди ва гуруҳда иккинчи ўринда қолиб кетди. Энди терма жамоамиз нимчорак финалда Австралияга қарши баҳс юритади. Аммо, ушбу мағлубит терма жамоамиз устози Эктор Куперни у қадар ҳам хафа қилмади. У бу ҳақда хатто ўйиндан кейин ўтказилган матбуот анжуманида ҳам айтиб ўтди.

Мусобақа "сеткаси"га яхшилаб назар солгач шуни тушуниб етдимки, чиндан ҳам японлардан учралган мағлубият хафа бўлишимизга арзимайди. Хатто, бу бизнинг фойдамизга ишлаши мумкин. Чунки, биз Австралия тўсиғидан ўтиб олсак, чорак финалда нисбатан осонроқ рақибга дуч келишимиз мумкин. Аниқроғи, бу босқичда биз БАА ва Қирғизистон терма жамоалари жуфтлиги ғолибига қарши баҳс юритамиз.

Агар Японияни ютган тақдиримизда Саудия Арабистонига тўқнаш келган бўлардик. Уларни мағлуб этганимизда эса ёрқин ўйин кўрсатаётган Иордания ва Виетнам жуфтлиги ғолибига қарши ўйнардик. Ярим финал йўлида эса Эрон бизга тўқнаш келишимиз мумкин эди.

Демак, Купер бежизга хафа бўлишга ҳожат йўқ деб айтмаган. Биз тўғри йўлдан боряпмиз.