Курашчи қизларимиз ҳам Осиё чемпионатида медаль олишди

Айни кунларда Ҳиндистоннинг Нью-Деҳли шаҳри спорт курашлари бўйича ёшлар ўртасидаги Осиё чемпионатига мезбонлик қилмоқда. Бугун аёллар кураши бўйича баҳсларга старт берилди. 

Қувонарлиси, классик курашчиларимизнинг медалли иштирокини курашчи қизларимиз ҳам давом эттиришмоқда. Бугун гиламга чиққан вакиламиз Набира Эсенбаева вазни 59 килограммгача бўлган курашчилар баҳсида кумуш медални қўлга киритди. Ҳамюртимиз дастлабки босқичда ҳиндистонлик, ярим финалда эса хитойлик рақибасини мағлуб этиб, финалда япониялик Юзуру Куманога қарши беллашди. Қизиқарли баҳс кунчиқар юрт вакиласининг ғалабаси билан якунланиб, спортчимиз кумуш медали билан тақдирланди.

Бугун шунингдек, Актенге Кеунимженова, Ҳадича Нажимова, Динова Рустамова каби спортчиларимиз ҳам ўз омадларини синаб кўришди, бироқ афсуски илк даврадаёқ медаллар учун курашдан чиқиб кетишди. Эртага ҳам бир қатор вакилаларимизнинг иштирок этиши белгиланган.