Маҳмуд Муродов: Ўзбекистондаги илк ғалабамни юртдошларимга бағишламоқчиман
Хабарингиз бор, 9 сентябрь куни Тошкентдаги “Бунёдкор” стадиони яккакураш жанг санъатлари бўйича ташкил этилаётган халқаро “Asian Fight-2017” мусобақасига мезбонлик қилади.
Мазкур жанг кечасида 9 нафар спортчимиз юртимиз шарафини ҳимоя қилади. Улар орасида аралаш яккакураш жангларида (ММА) фаолият олиб бораётган ўзбекистонлик Маҳмуд Мурадов (13-6) ҳам рингга чиқади. Унга ушбу шоуда озарбайжонлик Зия Мирзаев рақиблик қилади.
SPORTS.uz интернет портали мухбирлари спортчимиз билан мусобақа олдидан тайёргарликлари ҳамда фикрлари ҳақида қисқача суҳбат ташкил қилди.
– “Asian Fight-2017” мусобақасида иштирок этиш таклифини қачон олдингиз?
– Ушбу мусабақада иштирок бўйича таклифни тахминан икки ой аввал Ўзбекистонда бўлган вақтимда қабул олган эдим. Бу мени жуда хурсанд қилди.
– Бу мусобақа ҳақидаги фикрларингиз қандай?
– Биринчидан, бу қамровли бўйича жуда йирик мусобақа. Албатта, бу турнир мени қизиқтириб қўйди. Ўз уйимда, Ватанимда мухлисларимиз олдида рингга чиқиш бу шараф. Бу ердаги атмосфера, муҳит мени ўзига жалб қилди. Шу кунга қадар она юртимда жанг ўтказмаганман. Шунинг учун ҳеч иккиланмасдан иштирок этиш учун рози бўлдим.
– Бу мусобақада қандай тайёргарлик кўряпсиз? Машғулотлар қаерда ўтмоқда?
– Турнирда иштирок этишга розилик берганимдан сўнг тезда Чехияга йўл олдим. У ерда машқларга зўр бердим. Кейинги босқич Польшада бўлиб ўтди. Сўнг Словакияга. Учинчи ва якуний босқич Ўзбекистонда ўтяпти.
– Бўлажак жангдаги рақибингизни биласиз? У ҳақда нима дея оласиз?
– Рақибим жуда яхши спортчи, Озарбайжондан. Жанговар самбо ва пенчак-силат бўйича бир неча бор жаҳон чемпиони, турли нуфузли мусобақалар ғолиб ва совриндори. Турган ҳолатда яхши жанг олиб боради. Партерда ҳам тажрибаси катта. Пухта тайёргарлик кўрдим. Йиғинлар аъло даражада ўтди. Қувонарлиси, юртдошларимиз олдида жанг қилишим кучимга куч қўшади, деган умиддаман. Ғалаба қозониш учун барча маҳоратим ва тажрибамни ишга соламан. Ғалабам байрамга муносиб совға бўлади.
– Бу турнир Сизга нима беради?
– Биринчидан, мен учун ўз она юртимда жанг ўтказиш - бу шараф. Мусобақа юқори даражада ташкиллаштирилганига гувоҳ бўляпман. Ўтказиладиган жойи ҳам албатта мақтовга сазовор. Бу каби турнирлар ёшларни ўзга жалб қилиши ва уларнинг сонини ошириши шубҳасиз. Унга ташриф буюрган ёки турли манбаалар орқали кузатадиганлар учун албатта катта байрам бўлади, деб ўйлайман. Такрор ва такрор айтаман, биз ўз ишимиз билан бошқаларга ижобий томондан ўрнак бўла олишимиз шарт.
– Бу каби турнирлар Ўзбекистонда илк марта ўтказилмоқда. Сизнинг фикрингиз...
– Бу турнир Ўзбекистондаги қамрови бўйича илк ва йирик мусобақа саналади. Умид қиламанки, охиргиси ҳам эмас. Ўсиб келаётган ёш авлодимиз кучли, ғайратга тўла. Бизнинг авлод фақат ва фақат юқори марраларга интилиш зарур. Бўлажак турнир ташкилотчилари фаолиятини давом эттиради. Биз эса унда иштирок этиб, мухлисларни хурсанд қилишда давом этамиз.
– Мухлисларга тилакларингиз...
– Биринчи навбатда барча юртдошларимизни яқинда ўтган қўшалоқ байрам билан табрикламоқчиман. Жонажон юртимиз мустақиллигининг 26 йиллиги ва Қурбон ҳайити билан чин юрагимдан муборакбод этаман. Барчага соғлик-саломатлик, оилавий бахт тилайман. Шу ўринда юртбошимиз, ҳурматли Шавкат Миромонович Мирзиёевга ўз миннатдорлигимни изҳор қилмоқчиман. Уларнинг Ватанимиз ривожи учун тинимсиз меҳнатларининг самарасини ўзингиз кўриб турибсиз, яратилётган шарт-шароитлар албатта, қувонарли. Шунингдек, биз спортчиларга мухлислик қилиб қўллаб-қувватлаётган спорт ихлосмандарига ҳам ташаккурлар айтиб қоламан.
– Биз эса ўз ўрнида ғалабаларни қўлга киритиб, уларнинг ишончини оқлашга бор куч ва ғайратимизни сарф қиламиз. 9 сентябр куни боладиган жангдаги ғалабамни Ватаним ва юртбошимизга бағишлаш ниятидаман. Ўсиб келаётган ёш авлод учун бизнинг мувафаққиятларимиз намуна бўлади. Мақсад уларни бекорчи бўлиб қолмаслиги, ёмон иллатларга берилмаслигининг олдини олиш. Улар бизга қараб нафақат спортда, балки турли соҳаларда юқори марраларни эгаллашга ҳаракат қилишлари барчамиз учун муҳим. Қўллаб-қувватлаганлари учун барчага раҳмат айтаман. 9 сентябр куни бўлиб ўтадиган турнирга ташриф буюринг ва бизга далда бўлинг. Сизнинг мухлислигингиз бизга жуда зарур, БИЗ БИРГАЛИКДА КАТТА КУЧМИЗ!
Фикрлар