Мирзаҳаким Тўхтамирзаев Азизбек Турғунбоевнинг машмашали трансфери, унинг айбдорлари ва бошқалар ҳақида гапирди
Ads

SPORTS.uz сайти мухлисларга янгиликлар тақдим этишда давом этади.

SPORTS.uz сайти ижодкорлари кўпчилик мухлисларнинг талаб ва истакларига биноан “Youtube”даги саҳифамизда лойиҳанинг давомини ҳавола қилади.

Хабарингиз бор, ушбу дастур кўпчилик соғинган таниқли шарҳловчи Мирзаҳаким Тўхтамирзаев билан биргаликда амалга оширилмоқда.

Қуйида мазкур лойиҳанинг бу галги сонини видео ва матн шаклида тақдим этамиз.

ИККИ КЕМАНИНГ БОШИНИ ТУТГАН ҒАРҚ БЎЛАДИ дейишади.

Иккита клуб билан шартнома тузган футболчининг якунда дисквалификация қилиниши кутилган ҳолат эди ва шундай бўлди ҳам.

Ҳуқуқий саводхонлик – долзарб муаммо, футболдан четлатилганлар, агар қонун-қоидаларни яхши ўзлаштиришганида, бугунги ҳолга тушишмасди.

Жаъфар Ирисметов наманганликларни расман хабардор қилиб, сўнгра шартнома тузишга уриниши керак эди. Тўғри, бу билан у “Навбаҳор” мутасаддиларини фаоллаштириши ва Турғунбоевсиз қолиши мумкин эди. Охир-оқибат, барибир бу футболчи пойтахтликларга насиб этмади-ку!

“Пахтакор”га Азизбек, аслида, нима учун керак эди: ўз таркибини кучайтириш учунми ёки асосий рақиблардан бирини кучсизлантириш учунми?

Менимча, иккинчиси. “Насаф”нинг совринли ўринлар учун даъвогарлар сафидан чиқишига кўплаб етакчиларининг пойтахтга олиб кетилиши сабаб бўлганини эслашнинг ўзи кифоя... Қаршиликлар ўз вақтида Қашқадарё вилояти ҳокими бўлиб ишлаган ва футболни жон-дилидан севган Нуриддин Зайниев (охиратлари обод бўлсин!) саъй-ҳаракатлари билан барпо этилган клуб футбол академияси самарали ишлагани туфайли кучлилар лигасида ўз ўрнига эга бўлиб қолмоқда.

Наманганда камол топганлар тақдирини ўйлар экансиз, “Олдингдан оққан сувнинг қадри йўқми?” деган савол туғилади. Агар 2018 йил ёзида Турғунбоев билан шартнома янгиланса ёки узайтирилса, олам гулистон эди.

Ҳар қандай шароитда ҳам “Навбаҳор” бошқа клуб шартнома тузганини расман эълон қилган ва ЎФАда расмийлаштирган футболчини хорижий йиғинга олиб кетмаслиги керак эди;

Азизбекнинг аввал битта, сўнгра бошқа жамоа билан шартномага имзо чекишини оқлаб бўлмайди. Қўшимчасига гоҳ у, гоҳ бу жамоа босим ўтказганини айтиб, ўзини оқлашга уриниши ярашмабди.

Россиялик агентнинг ўзини кўрмай-билмай туриб шахсий манфаатларига зид шартнома имзолаганига нима дейсиз?! Ўша агент Ўзбекистон терма жамоаси аъзосига “керак бўлганда бутси олиб берганман” деб таъна қилиб турганига-чи? Наҳотки, Турғунбоев шунчалик ночор аҳволга тушган...

Мабодо шу гап рост бўлса, клуб мутасаддиларига қойил қолмаслик керак. Вилоят ҳокими барча шароитни яратиб бераётганда, етакчи футболчи бутсига зор бўлишини тушуниш мушкул. Агар ёлғон бўлса, нима учун агентга ҳеч ким: на футболчи, на “Навбаҳор” клубидагилар расман эътироз билдирмаяпти. Ўша бутсилар тиллодан бўлсаям нархи ярим миллион еврога тенг келармикан? Шундай “қимматбаҳо” агент мижози мушкул аҳволга тушганда нима учун етиб келмади, уни қўллашга уринмадиям. Москвадан Тошкентга келиб-кетиш учун пули етмадими ё хоҳламадими?

ЎФА 1-вице-президенти вазият бўйича берган интервьюсида кўплаб тўғри фикрларни билдирган: 1) Азизбек ёш бола эмас. Келажаги ҳақида аввало ўзи ўйлаши шарт. 2) у миллий терма аъзоси бўладими ёки оддий футболчи – қонун-қоида ҳамма учун бир... Ва тўртинчидан, қандай босим бўлмасин, қандай ишонтиришмасин, футболчи ўз ҳақини талаб қилишни ўрганиши керак. Кимдандир қўрқса, мана, ЎФАга мурожаат қилсин. Қайсидир футболчининг ҳуқуқлари поймол этилаётган бўлса, уни ҳимоя қилишга кучимиз етади...

Турғунбоевни “қандай ҳимоя қилишганини” кўрдик: 6 ойдан бир неча кун камроққа четлатишди ва молиявий жарима солишмади!

Қарорга муносабат билдирган “Навбаҳор” клуби вице-президенти Шамшод Сариков ҳозирги жамоасини “Пахтакор”дан қўрқадиган олдинги “Навбаҳор” эмас деганига кўпчилик эътибор берди, албатта. Сариковнинг бу фикрини қабул қилиш қийин. Менимча, Ҳакимжон ака Ҳошимов (охиратлари обод бўлсин!) раҳбарлик қилган клуб “Пахтакор”дан асло ҳайиқмай иш юритган ва мамлакат чемпиони унвонини қўлга киритган.

Шамшод Сариковнинг футболчини оқлашга уриниши ҳам ишончли чиқмаган.

“Турғунбоев ҳақиқий Наманган фарзанди эканлигини, “Навбаҳор”ни яхши кўришини ва мухлисларни ҳурмат қилишини ҳаммамизга кўрсатиб берди. Бу ерда ҳеч қанақасига Азизбекни айби бор, деб ўйламайман. Футболчи балки хато қилгандир, лекин уни хато қилишга мажбур қилишган...” деб билдирган фикрларига ишонмаслигимизнинг сабаби оддий: агар клубда вазият яхши бўлганида, Турғунбоев, мабодо Мўминжонов мажбурлагандаям, вазиятдан клуб раҳбарларини ўтган ёздаёқ хабардор қилиши зарур эди, “Навбаҳор” билан шартномани узайтириш хусусида ташаббус билан чиқиши керак эди...

Россиялик агентига бошқа кучли жамоага ўтмоқчилигини айтгани-чи? – Буям “Навбаҳор”ни яхши кўришидандир-да...

Турғунбоев 2018 йилнинг 3 декабрь куни “Пахтакор”да ўйнашни истаётгани, бироқ унинг бу қарорига “Навбаҳор” томонидан босим бўлаётгани ҳақида ўз қўли билан ариза ёзиб кетган”ини таъкидлаган футболимиз мутасаддилари ҳам можаро авжига чиқишини кутмай, ойдинлик киритганда бунча гап-сўз бўлмасди.

Энг муҳими “қўрқиш-қўрқитиш” эмас, оқилона қарор қабул қилиш зарур. Шунда ҳеч ким қўрқмайдиям, қўрқитмайдиям.

Бу воқеа бошқаларга ибрат бўлади деган умиддамиз.

Ярим йил тезда ўтиб кетади. Турғунбоев яна яшил майдонга қайтади. Ҳозирча, у жароҳат олган (аслидаям, руҳий жароҳат олди-ку!) ва даволанишда деб ҳисоблаймиз. Ёзда қайси жамоа сафига бориб қўшилмасин, осон бўлмайди. Айниқса, Намангандаги ўйинларда унинг ҳар бир хатоси ўта оғир қабул қилинади. Шунинг учун ҳам ҳозирги вазиятда асосий айб айнан унинг ўзидалигини тушуниб етишини, айрим “ишонтирувчи ва юпатувчилар”дан четроқ юриб, астойдил шуғулланишини, ва энг муҳими – катта футболга қайтганида унинг ўйини қовушишини хоҳлардик.

Азизбек – истеъдодли футболчи. Кучли жамоаларда ўйнаб, ўзбек футболи ривожига ҳисса қўшса, ҳаммамиз фақат ва фақат хурсанд бўламиз.

Фикрлар

Фикр қолдириш учун авторизациядан ўтинг!
&
darwesh
09/02/2019 12:39
Агент-уйинчи муносабатлари бизда ривожланмаган. Бунга хали етиб келамиз
Ronaldo Junior
08/02/2019 22:05
Bir tomonlama gap bo`libdi
Djasurbek Ghafurdjanov
09/02/2019 13:52
Жуда кенг қамровли,ҳаққоний ёндошилган анализ бўлган бу машмашали олди сотдига.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98