Osiyo kubogi – 2019. Tanishing, BAA terma jamoasi

Qit’amizning yirik musobaqasi oldidan SPORTS.uz sayti Osiyo kubogida ishtirok etuvchi terma jamoalar bilan tanishtirishni boshlaydi. Tanishtiruvni mezbon mamlakat – BAA terma jamoasidan boshlaymiz.

BAA Federativ davlati 1971 yilda 6 Amirlikning (Abu-Dabi, Ajman, Dubay, Umm-El-Kayvayn, Fujayra va Sharja) birlashuvi natijasida paydo bo‘lgan. Oradan bir yil o‘tib esa yana bir amirlik – Rass-Al-Xayma ham mazkur Federatsiyaga qo‘shiladi.

Futbol bo‘yicha BAA milliy terma jamoasi esa o‘zining ilk uchrashuvini 1972 yilda Qatarga qarshi o‘tkazgan va 1:0 hisobida g‘alaba qozongan.

“Oqlar” o‘z tarixlarida ilk va so‘nggi marta 1990 yilgi JChda ishtirok etishgan. Italiya maydonlarida kechgan mundialda Karlos Alberto Parreyra shogirdlari guruh bosqichida Kolumbiya (0:2), GFR (1:5) va Yugoslaviyaga (1:5) mag‘lub bo‘lib guruhda so‘nggi o‘rinni oladi.

Osiyo kubogida esa hozirga qadar 9 bor ishtirok etgan. 1980, 1984, 1988 yilgi musobaqada guruh bosqichidayoq kurashni to‘xtatgan. 1992 yilgi qit’a birinchiligida esa 4-pog‘onani egallagan.

Mazkur musobaqadagi eng yaxshi natijasini esa o‘z uyida o‘tgan, 1996 yilgi turnirda 2-pog‘onani egallagan. O‘shanda Tomislav Ivich shogirdlari  guruh bosqichida Janubiy Koreya (1:1), Quvayt (3:2) va Indoneziyani (2:0) ortda qoldirib yarim finalga chiqadi. Final uchun kurashda esa Quvaytdan (1:0) ustun kelib finalga chiqadi. Hal qiluvchi uchrashuvda penaltilar seriyasiga ko‘ra Saudiya Arabistoniga mag‘lub bo‘ladi.

2000 yil Livan mezbonlik qilgan Osiyo kubogida esa saralashdan o‘ta olmagani bois, ishtirok etmaydi. 2004, 2007 va 2011 yilgi musobaqalarda ham BAA terma jamoasi kurashni guruh bosqichidayoq yakunlashga majbur bo‘lgan.

Avstraliya maydonlarida kechgan so‘nggi qit’a birinchiligida esa Mahdi Ali boshqaruvidagi BAA terma jamoasi 3-o‘rinni qo‘lga kiritgan edi.

Bugungi kunda esa BAA termasiga italiyalik Alberto Zakkeroni bosh murabbiylik qilmoqda. 65 yoshli mutaxassis 2017 yilning 16 oktyabridan buyon “Zayd bolalari”ni shug‘ullantirib kelmoqda. Uning qo‘l ostida terma jamoa 11 bellashuvda maydonga tushdi va bor yo‘g‘i 2 ta o‘yinda g‘alaba qozondi xolos. To‘g‘ri, BAA terma jamoasi so‘nggi vaqtlarda Lotin Amerikasi, Evropa va Afrika mamlkatlari jamoalariga qarshi bahs o‘tkazishmoqda va bu ham natijalarning salbiy tus olishiga sabab bo‘layotgan omillardan biridir.

Osiyo kubogi-2019 ning mezboni sifatida saralash bosqichida ishtirok etmagan BAA termasi qur’a natijasiga ko‘ra “A” guruhida Tailand,  Hindiston hamda Bahrayn termalariga qarshi kurash olib boradi. Ular ayni damda FIFA reytingida 82-o‘rinni egallab turishibdi.

BAA terma jamoasi haqida qiziqarli faktlar:

Dastlabki o‘yin: 1972 yil 17 mart Qatarga qarshi;

Eng yirik g‘alaba: 2001 yil 14 aprel Bruney – BAA  0:12;

Eng yirik mag‘lubiyati: 2005  yil 12 noyabr BAA – Braziliya 0:8

Eng ko‘p o‘yin o‘tkazgan futbolchi: Adnan Al Talyani – 161 ta o‘yin;

Eng yaxshi to‘purar: Adnan Al Talyani – 52 ta gol;

Eng yaxshi natijasi: Osiyo kubogi-1996 da 2-o‘rin.