Отабек Ғуломхўжаев: Хатто аэропортни биринчи марта кўраётган футболчилар бор

Хабарингиз бор, Отабек Ғуломхўжаев бошчилигидаги Ўзбекистон U-17 терма жамоаси Испанияда йиғин ташкил этиб, у ерда Шотландия, Бельгия ва Франция терма жамоалари билан халқаро ўртоқлик учрашувларини ўтказди. Иккита дуранг ва бир мағлубият билан қайтган жамоамиз у ерда ўзидан ёмон таассурот қолдиришгани йўқ. Фурсатдан фойдаланган ҳолда бош мураббий Отабек Ғуломхўжаев мазкур йиғин ва ўйинлар ҳақида SPORTS.uz муҳбирига ўз фикрларини билдириб ўтди.

Испания сафари ҳақида

- Таассуротларим жуда катта. Европада ёшларнинг футболдаги қилаётган ўйинларини кўриб ажойиб тарзда ҳайрон қолдим. Ҳар бир футболчисининг тўп билан муомаласи, мураббийларнинг кўрсатмаларини қай тариқа бажараётгани, умуман олганда, уларнинг ўйин ташкил этиши юқори даражада. Айниқса, Бельгияга қарши ўйинимизда худди рақиб бизга нисбатан икки баробарга кўпга ўхшаб кўринди. Тўғри, дуранг ўйнадик, аммо йирик ҳисобда ютқазишимиз ҳам мумкин эди. Рақиб жамоанинг мураббийлари билан ҳам гаплашдик. Улар машғулотлардаги ҳар бир эпизодни ўйиндан олиб бажаришади. 18-19 ёшда катталар футболи каби ўйнашади. Тан олиш керак, бундай кучли рақибларга қарши ўйинлар биз учун катта фойда беради. Мана шундай жамоаларга қарши учрашувларни ташкил этиб бергани учун футболимиз раҳбариятига яна бир бор миннатдорчилик билдираман. Шахсан ўзим учун ҳам Испания йиғини катта мактаб бўлди. Иккита дуранг ўйнаб, бир бор ютқаздик. Учрашувлар давомида ҳимояга ётиб олганимиз йўқ. Шунчаки, ҳимояда тартибли ўйнашга ҳаракат қилдик. Биз бунгача қисқа вақт давомида шуғуллангандик. Шу боис ҳужумкор ўйин кўрсатишимиз қийин эди. Аммо Бельгия билан учрашувда 20 дақиқа давомида ҳужумкор ўйин кўрсатишга уриниб кўрдик ва шунинг эвазига гол ҳам уриб олдик. Ҳужумда индивидуал томондан яхши ўйинчиларимиз бор эди. Гол урганимиздан кейин кўпроқ ҳимояга эътибор қаратишни бошладик. Лекин Бельгиядек рақибларга қарши 90 дақиқа давомида очиқ футбол таклиф қилиб бўлмайди. Улар голни дарвозамизга стандарт вазиятдан киритишди. Умуман хулоса сифатида айтадиган бўлсам, очиғи кейинги йиғинда бу таркибнинг 40-50 фоизини алмаштираман. Негаки, бизда қолиб кетган яна кўплаб ўйинчиларимиз бор. Уларга ҳам имконият беришимиз керак. Биласизми, Испанияга кетган таркибимизда мен ишонган айрим футболчиларимиз бор эди. Аммо кучли рақибларга қарши учрашвларда улар “йўқолиб” қолишди. Аксинча, баъзи футболчиларимиз асосий таркибдан жой олиш учун ўзларини яхши томондан кўрсата олишди. Оддий мисол, сафимизда ҳатто аэропортни биринчи марта кўраётган футболчилар бор. Бундай йигитларимизга Ўзбекистон либосини кийиш албатта ҳаяжон ва босимни юклайди. Аммо уларга яна имконият берамиз. Лекин яна бир жиҳатни айтишим керакки, тактик томондан айниқса, “Пахтакор”, “Бунёдкор” ва “Насаф”дан чақирилган футболчилар билан ишлаш осонроқ бўлди. Яна бир жиҳатни ҳисобга олишимиз керак, ҳозирги таркибимиздаги 70-80 фоиз футболчиларимиз ҳали футбол мактаби ва академияларда ўқишади. Масалан, Бельгия терма жамоасидаги икки нафар ўйинчи маҳаллий клублардан олинган, қолган футболчилари эса легионерлар. Энди уларнинг ўйнаётган клубига қаранг: “Манчестер Юнайтед” ПСЖ, “Барселона” каби кучли клубларнинг ёшлар жамоаларида тўп суришади. Хоҳлардимки, бизнинг футболчиларимиз ҳам ўз клубларида кўпроқ ўйин амалиётига эга бўлишса, бу бизга ҳам осон бўларди. Кучли термалар билан ўйинлар орқали жамоамнинг ҳозирги ҳолатини кўриб олдим.

Устун ва камчиликларимиз

- Мазкур учрашувлар давомида бизнинг устун кўринган жиҳатимиз шу бўлдики, олдинги чизиқда индивидуал томондан кучли футболчиларимиз бор. Лекин ҳали жамоавий ўйин борасида бирор нима дея олмайман. Чунки бу таркибни йиққанимга энди 2-3 ой бўляпти. Мен шу вақт давомида 80 та болани кўрдим ва уларнинг орасида танлаб олган 20 нафар футболчи билан ишлаётганимга эса ҳали бир ой ҳам бўлгани йўқ. Лекин тез орада жамоавий ўйинни йўлга қўйиб оламиз. Кучсиз томонимизга келсак, дарҳол айтаманки, бизда бўйдор ўйинчиларимиз жуда кам. Атлетизм жиҳатдан ҳам яна ишлашимиз керак. Аммо жисмоний тарафдан жиддий муаммолар бор деб ўйламайман. Керак бўлса, ўйинлар пайтида маълум вақт давомида Францияни ҳам, Шотландияни ҳам чарчатиб қўйдик. Умумий олганда, бутун жамоа сифатида яхши ҳимояланяпмиз. Ярим ҳимоячиларимиз борасида ҳам яхши фикрлар билдиришим мумкин. Лекин яккама-якка курашларда ютқазиб қўйяпмиз. Лекин бизда ҳам вақт ўтган сари шу ёшдаги иккита жамоани шакллантириб олиш режамиз бор.

Бу халқаро турнир эмас!

- У ердаги шароитлар борасида гап бўлиши мумкин эмас. База, машғулот майдонлари, меҳмонхоналар, умуман бу каби масалалар юқори даражада ҳал этилган. Биздан ташқари, Россия, Дания, Швециянинг катта ёшдаги термалари ҳам бор эди. Лекин улар ўзлари ўйнашди. Масалан, Бельгия Испания тўрт кунга келган. Яъни, фақат биз билан ўйнаш учун келиб кетишди. Франция эса фақат бизга ва Шотландияга қарши ўйнади. Бу халқаро турнир эмасди, шунчаки хориж йиғини бўлди.

Францияга бой берилган ўйин

- Фанция билан учрашувда улар бизнинг бунгача ўтказган иккита ўйинимизни кўришганди. Улар бизни асосан бўйдор ўйинчилари эвазига ютишди. Бизнинг футболчиларимизни бўйи эса ҳаттоки, уларнинг елкасичалик ҳам эмас. Шунинг ҳисобига иккинчи қаватни бой бердик. Бир сўз билан айтганда, бу йиғин бизга катта фойда беради. Ўзим учун ҳам жамоамиз ўзагини аниқлаб боряпман. Ушбу учрашувда иккита беллашувда майдонга тушмаган футболчиларни ҳам ўйнатдим. Бу 2024 йили бўладиган Олимпиада учун бўлажак жамоа ҳисобланади. Биз ҳали футболчиларни яна саралашда давом этамиз.
Кейинги режалар

- 2002 йилда туғилган футболчиларнинг Республика тайёрлов гуруҳлари ўртасида мусобақа бўлади. Эшитишимча, ўйинлар Қаршида ўтказилади. У ерга бориб селекция жараёнини ўтказаман. Ноябрь ойининг охирларига яна бир йиғин мўлжалланмоқда. Буни раҳбарият ишлаб чиқяпти. Биз иккинчи бор яна хориж йиғинига кетишимиз мумкин. Агар бу режа амалга ошмаса, унда Тошкентда шуғулланамиз.

Шуҳратбек Жўраев суҳбатлашди.