“Ўзбекистон талабалар спорти Ассоциацияси”нинг сайлов конференцияси ўтказилди

Унда, Ўзбекистон Миллий олимпия қўмитаси раисии Умид Аҳмаджонов, Бош котиб Жасур Матчанов, Жисмоний тарбия ва спорт вазирлиги, Адлия вазирлиги, мамлакатимиздаги олий таълим муассасаларида фаолият олиб бораётган бир қатор мутасадди ҳодимлар иштирок этди. 

– Бугунги кунда талабаларимизни спортга жалб қилиш масаласини ҳам алоҳида кўриб чиқяпмиз. Бундан буён талабалар ўртасида жамоавий спорт туларини ривожлантиришимиз керак. Республикамизда 80 дан ортиқ олий ўқув юртлари мавжуд. Энди улар ўртасида турли мусобақалар ташкил қиламиз. Яхши биламиз, мамлакатимиздаги барча олий ўқув юртларида спорт билан шуғулланиш учун яхши шароитлар бор. Аниқроқ айтадиган бўлсам, у ерда тайёр базалар мавжуд. Талабалар ичидан ҳам кучли спортчиларни саралаб олишимиз керак, –  деди Умид Аҳмаджонов. 
Шунингдек, янги тақвим-режа ишлаб чиқиб, қизиқарли ва оммабоп мусобақалар янги йўналишда ташкил қилиш керак. Бундай турнирлар талабаларнинг ўзи учун ҳам жуда қизиқ бўлади деб ўйлайман. Мақсадимиз барча талабаларни спортга жалб қилиб олиш. Улар ўқишдан бўш вақтида спорт билан шуғулланишини таъминлашдир.  

Ўзбекистон миллий олимпия қўмитаси Бош котиб Жасур Матчанов конференция кун тартиби билан таништириб ўтди. 

Ҳисобот сайлов-конференциясида бунгача фаолият олиб борган “Баркамол авлод” спорт жамияти ҳамда “Талаба” спорт ассоциацияси негизида янги “Ўзбекистон талабалар спорти Ассоциацияси” ташкил қилиш таклифи берилди. Мазкур таклиф йиғилиш иштирокчилари томонидан бир овоздан маъқулланди. 

Янги Ассоциация раиси лавозимига Ўзбекистон Олий ва ўрта махсус таълим вазири Ином Уришевич Мажидов номзоди таклиф этилди. Конфренцияда йиғилганлар бир овоздан ушбу номзодни қўллаб-қувватлади. Бош котиб лавозимига эса Ўзбекистон "Баркамол авлод" спорт жамияти Марказий Кенгаши раисининг биринчи ўринбосари Эркин Ибрагимович Қодиров сайланди. 

Ассоциация раис ўринбосарларига Ўзбекистон спорт фаҳрийлари кенгаши раиси, Миллий олимпия қўмитаси раисининг маслаҳатчиси Комилжон Худойберганов, Спорт фаҳрийлари кенгаши раиси маслаҳатчиси Рашид Қодиров, Тошкент давлат Иқтисодиёт университети кафедра мудири Александр Истоминлар тайинланди. 

Конференцияда шунингдек, Ассоциация Ижроия қўмитаси ва унинг низоми ҳам тасдиқланди. 

Энди мамлакатимизда ташкил қилинадиган уч босқичли спорт ўйинлари бошқача йўналишда, янги  ўтказилиши маълум қилинди.