Pepsi Суперлига. “Насаф” - “Қўқон-1912”. Устунлик "аждарлар" томонида

Хабарингиз бор, Pepsi Суперлиганинг 18-тур учрашувини ўз майдонида “Қўқон-1912” жамоасига қарши ўтказади. Учрашув 23 июл душанба куни Қарши шаҳридаги “Марказий” стадионда соат 21:00да бошланади.

Pepsi Суперлига. 18-тур

“НАСАФ” - “ҚЎҚОН-1912”

23.07.2018. “Марказий” стадион. 21:00да

Бош ҳакам: Зокир Қодиров (Навоий)

Қанот ҳакамлари: Руслан Самандаров (Навоий), Обид Жумаев (Навоий)

Захира ҳаками: Рустам Лутфуллин (Тошкент)

Назоратчи: Марат Исмоилов (Тошкент)

Комиссар: Роман Черников.

Учрашув аҳамияти ҳақида

Ушбу учрашув жамоамиз учун катта аҳамиятга эга. “Аждарлар” беш учрашувки, ғалабани "унутиб" қўйишди. Бўлажак учрашувдан мухлисларимиз ҳам ғалаба кутишмоқда. Умид қиламизки, футболчиларимиз мухлисларимизни хурсанд қилиш учун, ушбу ўйинда бор маҳоратларини ишга солишади.  

Ўзаро учрашувлар тарихидан

Мазкур жамоалар шу пайтгача миллий чемпионатимизда ўзаро 17 марта туқнаш келишган. Шундан 12та учрашувда жамоамиз ғалаба қозонган. 4 учрашувда қўқонликларнинг қўли баланд келган. Энг қизиқарлиси жамоалар ўзаро учрашувларнинг фақат биттасида дуранг натижа қайд этиишган. Бу дуранг шу йили Қўқонда бўлиб ўтган учрашувда қайд этилган эди.

Тўплар нисбати бўйича ҳам устунлик жамоамиз томонида 35-19.

Қаршида ўтган ўзаро учрашувларга оид

Қаршида бўлиб ўтган ўзаро учрашувлар тарихига назар ташласак, қизиқарли фактларга дуч келамиз. Бу жамоалар шу пайтгача Қаршида жами 8 марта ўзаро куч синашган. Бўлиб ўтган учрашувларнинг барчасида жамоамиз ғалабага эришган. Бўлиб ўтган 8 учрашувнинг фақат биттасида футболчиларимиз битта гол уришган, қолган учрашувларда эса учтадан кам гол уришмаган. Қаршидаги ўзаро учрашувларда дарвозаларга жами 30та гол киритилган. Тўплар нисбати 25-5ни ташкил этмоқда. Эслатиб ўтамиз, Қўқон шаҳрининг жамоаси 2002 йилдан ҳозирги номи билан, миллий чемпионатимизда иштирок этмоқда. Бунгача жамоанинг номи “Темирйўлчи” бўлган.

Қаршида бўлиб ўтган барча учрашувлар:

06.08.2017. “Насаф” – “Қўқон-1912” 3:0

15.04.2016. “Насаф” – “Қўқон-1912” 1:0

02.04.2015. “Насаф” – “Қўқон-1912” 3:0

18.06.2003. “Насаф” – “Қўқон-1912” 4:0

24.08.2002. “Насаф” – “Қўқон-1912” 4:1

19.04.2000. “Насаф» - “Темирйўлчи” 3:1

11.09.1999. “Насаф» - “Темирйўлчи” 3:2

02.10.1998. “Насаф” – “Темирйўлчи” 4:1

Ўзаро учрашувлардаги йирик ҳисоблар

Жамоамизнинг ўзаро учрашувларда қозонган энг йирик ғалабаси – 4:0га тенг. “Қўқон-1912”да бу кўрсаткич 3:0га тенг. Тарихда қолган бу учрашувлар 2003 йили бўлиб ўтган, “Насаф” – “Темирйўлчи” 4:0 учрашувида жамоамизнинг ўтмишдаги тўпурари – Зафар Холмуродов хет-трик қайд этган ва Дилшод Мавланов бир марта гол муаллифи бўлган. Иккинчи даврада Қўқонда бўлган учрашувда эса Шуҳрат Раҳмонқулов дублни нишонлаган, Шуҳрат Юсупов эса дарвозамизга битта тўп йўллаган.

Жамоаларнинг навбатдаги учрашуви 18-учрашув сифатида тарих саҳифасидан жой олади. Бу учрашув, “Насаф”нинг олий лигадаги 636- учрашуви ҳисобланади.

Ушбу  учрашув қандай ёритилади?

Бўлажак учрашувни одатдагидек сайтимиз орқали тўлиқ онлайн матнли трансляция қиламиз. Бундан ташқари клубимиз ижтимоий тармоқларидаги расмий каналлари орқали ҳам учрашувга оид маълумотлар бериб борилади. Шунингдек учрашув mycujoo.com сайти орқали ходимларимиз томонидан онлайн видеотрансляция қилинади. Учрашув Спорт телеканали орқали ҳам тўғридан-тўғри намойиш қилиниши режалаштирлган.

Азиз клубимиз мухлислари!

Бўлажак “Насаф” – “Қўқон-1912” жамоалари ўртасидаги учрашув жуда қизиқарли ва муросасиз курашларга бой бўлишига ҳеч қандай шак-шубҳа йўқ. Ушбу учрашув жамоамиз учун ҳам муҳим учрашув ҳисобланади. Жамоамизга сиз азиз мухлисларнинг далдаси жуда зарур. Бу йигитларимизга куч ва қувват беради.

Ўтган учрашувда Тошкентга ташриф буюрган жамоамиз мухлислари ҳақиқий содиқликларини, “Насаф”ни чин юракдан яхши кўришларини кўрсатиб қўйишди. Мухлисларимизнинг бундай жонбозлиги ва содиқлигидан футболчиларимиз ва мураббийларимиз жуда миннатдор бўлишди.

Шундай экан, келаётган душанба куни барча футбол ишқибозларини “Марказий”га стадионимизга чорлаб қоламиз.

“Насаф” – “Қўқон-1912” жамоаларининг ўринбосарлари ўртасидаги учрашув ҳар доимгидек Спутник қўрғонидаги ёшларимиз қароргоҳи майдонида бўлиб ўтади. Учрашув 22 июл якшанба куни соат 18:30да бошланади.