Вазир спортни оммалаштиришга бефарқ бўлган 5 нафар раҳбар ходимни ишдан олди
Ads
Жисмоний тарбия ва спорт вазири Дилмурод Набиев аҳолининг барча қатламлари ўртасида спортни оммалаштириш, ёшларнинг спорт билан шуғулланиши учун яратилган шароитлар ва улардан самарали фойдаланишни ташкил этиш, мавжуд спорт иншоотларининг моддий-техник аҳволини ўрганиш мақсадида Сирдарё вилоятида амалга оширилаётган ишлар билан танишди.
 
DSC_168314.JPG
 
Ўрганиш давомида Гулистон тумани болалар-ўсмирлар спорт мактабида давлат маблағлари эвазига харид қилинган кўплаб спорт жиҳозлари ва инвентарлари фойдаланмасдан омборхонада сақланаётгани, 2008 йилда қурилиб фойдаланишга топширилган Гулистон ихтисослаштирилган олимпия захиралари мактаб-интернати базасида усти ёпиқ бассейн 2 йилдан буён фаолият кўрсатмаётгани, Янгиер тумани болалар ва ўсмирлар спорти мактабидаги усти ёпиқ бассейннинг иситиш тизимидаги носозлик сабабли йил бўйи фойдаланиш имконияти йўқлиги маълум бўлди.
 
DSC_1635.JPG
 
Вазир Дилмурод Набиев ёш авлод саломатлиги йўлида йирик миқдордаги давлат маблағлари ҳисобига қурилган ушбу иншоотлар фойдаланилмаётгани ачинарли ҳолат эканини таъкидлаб, мутасаддиларга муаммоларни қисқа фурсатларда бартараф этиш топшириғини берди. Шунингдек, муассаса раҳбарларига замонавий маркетинг усулларидан унумли фойдаланган ҳолда давлат-хусусий шерикчилиги кўринишида ҳамкорликни йўлга қўйиш, олинган даромад ҳисобидан бассейнлар иш фаолиятини самарали ташкил этиш, моддий-техник базасини мустаҳкамлаш ва фидойи мураббийларни тақдирлаш лозимлиги таъкидланди.
 
DSC_1626.JPG
 
Вилоят жисмоний тарбия ва спорт бошқармаси ҳамда спорт таълими муассасалари раҳбарларига ёшларни спортга жалб этиш бўйича ишларни кучайтириш, ҳар бир болага куннинг исталган пайти ушбу муассасаларга ташриф буюриб футбол, волейбол, баскетбол, стол тенниси, бадминтон каби спорт турлари билан шуғулланиши учун қулай имконият яратиш вазифаси топширилди.
 
164588.JPG
 
Вазир мазкур иншоотлар қаторида бўлган Боёвут ва Ховос туманларидаги болалар ва ўсмирлар спорт мактабларининг қурилиши якунланмай қолган базаларида бўлиб, у ерда маҳаллий ҳокимлик мутасаддилари ва қурилиш ташкилотлари раҳбарлари билан учрашди. Мулоқот якунида мазкур масала ижобий ҳал қилиниб, зарур маблағлар қисқа муддатда ўтказилиши белгиланди. Қурувчилардан спорт объектларини қуришда, аввало, сифатга эътибор қаратиш сўралди.
 
DSC_1823 (1).JPG
 
Ташриф давомида мутасаддиларга аҳолининг кенг қатламини спортга жалб қилиш, айниқса, спорт билан шуғулланмайдиганлар рўйхатини шакллантириб, уларга мос спорт турларини тавсия этиш орқали спортга жалб қилиш, барча ёшдаги аҳолининг спорт билан шуғулланиши, корхона-ташкилотлар ходимларида соғлом турмуш тарзи, жисмоний тарбия кўникмасини шакллантириш учун барча шарт-шароитларни яратиш, ўзаро мусобақалар ташкил этиш бўйича вазифалар берилди.
 
Жисмоний тарбия ва спорт вазири ўз вазифасига совуққонлик билан қараган ва ёшларнинг спорт билан шуғулланиши йўлида давлат томонидан яратилган шароитлардан оқилона фойдаланмасдан, ўз ҳолига ташлаб қўйган 5 нафар раҳбар ходимни эгаллаб турган лавозимидан озод этди.
 
Манбаа: UzA.uz