Агар "Манчестер Юнайтед" Англия Лига кубогини қўлга киритса, Роналду медаль оладими?

Бугун Англияда "Манчестер Юнайтед" ва "Ньюкасл" ўртасидаги Лига кубоги финали бўлиб ўтади. Агарда ўйинда "қизил иблислар" муваффақият қозонса, Криштиану Роналду медал оладими? Португалиялик ҳужумчи ноябрь ойида клубни тарк этиб, шартномасини бекор қилганди.

"Goal" нашри хабарига кўра, Роналду медалга даъво қила олмайди, чунки у ушбу Лига кубогида ўйнамаган. Португалиялик футболчи соғлиғидаги муаммолар туфайли ноябрь ойида "Астон Вилла"га қарши ўйинни ўтказиб юборган.

Криштиану "Манчестер Юнайтед"ни жанжал билан тарк этган эди. Шартнома бекор қилинишидан бироз олдин португалиялик интервью бериб, клуб ва унинг айрим вакилларини танқид қилганди.