АГМК ярим ҳимоячиси жорий мавсум Суперлигада майдонга тушган энг ёш футболчига айланди

АГМК жамоаси нафақат совринли ўринлар учун курашувчан жамоа тузишда, балки таркибга ёш футболчиларни жалб этишга ҳам алоҳида эътибор қаратмоқда.

Жорий мавсум олмалиқликлар сафида ёшлар таркибидан жалб этилган Шероз Жалолов ва Санжар Жумабоев каби иқтидорли футболчилар қитъамизнинг энг нуфузли мусобақаси ОЧЛда дебют қилишди. Кеча эса жамоа бош мураббийи Миржалол Қосимов асосий жамоага ёшлар таркибидан жалб этган 17 ёшли (65 кун) Нодир Абдураззоқовни "Сўғдиёна"га қарши баҳсда захирадан майдонга туширди. Бу эса тарихий воқеага сабабчи бўлди. Гап шундаки, Нодир Абдураззоқов АГМК жамоаси сафида майдонга тушган энг ёш футболчига айланди. Бунга қадар ушбу рекорд 2008 йилги мавсумда майдонга тушган Фарруҳ Нурлибоевга (17 ёш 285 кун) тегишли эди.

Шунингдек, Нодир Абдураззоқов жорий мавсум Суперлигада майдонга тушган энг ёш футболчи сифатида ҳам тарихга кирди.

Маълумот учун, айни пайтда ёшларга ҳам жиддий эътибор қаратаётган АГМК жамоасининг ёшлари U21 Биринчилигида биринчи даврадан сўнг мусобақа жадвалида якка пешқадам сифатида карвонбошчилик қилмоқда.

АГМК матбуот хизмати.