"Ал-Аҳли" - "Андижон" ўйинидан кейин мураббийлар қандай фикр билдиришди?

“Ал-Аҳли” - “Андижон” (2:0) учрашувидан кейинги матбуот анжуманида дастлаб қисмида “Бургутлар” бош мураббийи Самвел Бабаян иштирок этди. Шундан сўнг “Ал-Аҳли” устози Юнус Али ва учрашувнинг энг яхши футболчиси - Мишел Влап қатнашдилар.

- Афсуски, жуда муҳим баҳсда мағлубиятга урчадик. Бу ўйиндаги ижобий натижа гуруҳдан чиқиш имкониятинимизни ҳосил қиларди. Албатта, ўзимиздан кўра кучлироқ жамоага ютқаздик, деб ўйлайман. Учрашувга учта муҳим компонентни белгилаб олгандик. Ўйинни ташкил қилиш, юқори тартиб-интизом ва ғалабага бўлган иштиёқ. Айнан шу омилларни вазифа қилиб белгилагандик. Афсуски, биз фақат ғалабага бўлган иштиёқни кўрсата олдик, холос. Бошқа йўналишлар бўйича эса биз рақиб билан рақобатлшаа олмадик. Обьектив ёндашадиган бўлсак, йигитларни жон-жаҳди билан ҳаракат қилишгани учун миннатдорчилик билдираман. Улар майдонда нима қилиш керак бўлса барчасини бажаришди. Умумий маънода, футболчиларга эътироз йўқ. “Ал-Аҳли”ни кейинги босқичга чиққани билан табриклайман. “Андижон” эса ўйлайманки, ғалабаларини кейинги мавсумда давом эттиради.

- “Андижон” учун жорий йилги мавсум тугади. Энди кейинги йил учун режалар қандай?

- Юқори натижаларга эришиш ва ўзбек футболида ўз ўрнимизни янада мустаҳкамлаш учун селекция ишларини амалга оширишимиз керак. Бу борада керакли ишларни амалга оширяпмиз. Даражаси юқори бўлган ўйинчилар билан шартномалар туздик. Кейинги мавсумда “Андижон” шарафини ҳимоя қилишади. Ўйлайманки, янги келадиган футболчилар ва олиб бораётган ишларимиз “Андижон”ни кучли жамоа сифатида шаклланишига хизмат қилади. Бу орқали мухлисларимизни хурсанд қиламиз. Сабр қилсак, “Андижон” фахрланадиган даражадаги жамоага айланади.

-------------------------------------------------------------------------------------------------------------------------------------------------------------------------------------------------------

Юнус Али: “Биринчи навбатда раҳмат. Менимча, бу жуда ҳам қийин ўйин бўлди. Кучли рақибга қарши ўйнадик. Улар жуда яхши ўйнашди. Ўйиндан олдин бу жамоага имкониятлар яратиб бермасликни айтгандим. Бу қийин эди, лекин ўйлашимча, ўйинчилар жуда ҳам яхши ўйнашди. Ўзимизни яхши кўрсатдик, кўплаб имкониятлар яратдик. Ўйлайманки, бундан ҳам яхшироқ натижаларга лойиқмиз. Асосийси, биз ютдик ва 3 очкони қўлга киритдик.

Мишел Влап: “Менимча, биз ўйинни яхши ташкиллаштирдик. Тўп билан жуда ҳам яхши ҳаракат қилдик. Табиийки, бизни битта мақсадимиз бор эди - бу ҳам бўлса ўйинда ютиш. Шунингдек, яхши ўйнаш ҳам ва бунга ҳамма тайёр эди. Учрашувда иккита гол киритдим, ҳаттоки, 3 та бўлиши мумкин эди. Баъзида имкониятни бой берасиз экан. Бироз чарчагандим. Бу ажойиб бўлди: 2 та гол урдим ва 3 очкога эга бўлдик, хурсандман”