Ампутант футболчимиз Абдулатиф Анорбоев: "Жуда алам қилади"

Айни дамда ампутант футболчилар ўртасида Ўзбекистон чемпионатининг иккинчи тури Жиззах шаҳрида давом этмоқда. Бундан унумли фойдаланган ҳолда, "Матонат" жамоасининг ёш аъзоси Абдулатиф Анорбоевни суҳбатга тортдик. Футболимиздаги энг кам эътибор қаратиладиган қисм саналган ампутант спортчиларимизнинг саволларга очиқ жавоб бергани мени ҳайрон қолдирди. Бунақасини профессионал футболчилар орасида ҳар куни ҳам учратавермайсиз.

- Абдулатиф, бу спортга кириб келишдан аввал кўплаб оғриқли операцияларни бошдан ўтказган экансиз...

"Шундай, аммо Яратгандан розиман. 2018 йилга қадар оёғимни операция қилишларига қарши чиқдим. Ёшлик чоғимда шифокорларнинг беэътиборлиги боис, бир оёғим ўсишдан тўхтаб қолди. Кейин, суяк чирий бошлади. Натижада, бир оёғимдан айрилдим. Футболни жуда ҳам яхши кўраман. Шу боис, шуғулланишни давом эттирдим. Ҳозир, Ўзбекистон Миллий университетининг тарих факультетида таҳсил оляпман. Ҳаётнинг оғир зарбаларига қарамай, ҳаракат қилишдан тўхтаганим йўқ".

- Ҳозир ички биринчилик давом этмоқда. Тўғриси, унинг даражаси 5 карра жаҳон чемпионлигини қўлга киритган мамлакатникига сира ўхшамаяпти.

"Афсуски шундай. Турнир ташкилотчиларига ҳеч қандай эътироз йўқ. Улар қўлдан келганча ҳаракат қилишмоқда. Бизнинг спортда ҳомийлар билан муаммо доим бўлгани боис, кўплаб майда деталларга эътибор ҳам қаратмай қўйганмиз. Мен Туркия биринчилигини кузатиб бораман. У ердаги атмосфера, инфратузилма ҳақида эшитганман. Бир нечта терма жамоадаги акаларимиз ҳозир ўша чемпионатда ҳаракат қилмоқда. Уларга яратилган имкониятларни кўриб, ҳавасим келади".

- Агар адашмасам, ампутант футболчилар ўз клубларида деярли маош олишмайди?

"Бу ҳақиқат. Ҳозир, чемпионлик учун кураш олиб бораётган 6 жамоада молиявий аҳвол бир хил. Барчамиз футболни севганимиз учун ҳам мусобақаларда иштирок этамиз. Ҳатто, Ўзбекистоннинг бир неча карра чемпиони "Матонат"да ҳам маош йўқ. Энди, бошқа жамоаларни тасаввур қилаверинг! Бизга мукофот пуллари онда-сонда тушиб қолиши мумкин. У ҳам жуда кам содир бўлади".

- Ўзи мукофот пули сифатида қанча тўланади?

"500 минг сўм. Бу йил икки маротаба беришди. Шунисига ҳам шукур. Асосийси, футболнинг ичидаман. Ўтаётган ҳар бир куним учун Яратганга шукурлар айтаман. Мен-ку майли, жамоадошларимнинг аксарияти оилали. Уларга раҳмим келади. Фарзандларини қолдириб, 5-6 кунлаб турнирларда тўп тепиш осон эмас. Билмадим, балки Ўзбекистонда бизни у қадар қадрлашмас. Кўплаб вилоятлардаги футболчилар Тошкентга машғулотлар учун келиб кетиш учун имкониятга эга эмас. Йўл ҳақи учун яхшигина пул сарфланади. Натижада, футболни жонидан ортиқ кўрадиган кўплаб йигитлар ундан узоқлашишга мажбур бўлмоқда. Бу улар учун жуда оғир зарба. Мен Сирдарёдан Тошкентга қатнаб, машғулотларда иштирок этган инсон сифатида буни яхши ҳис қиламан".

- Бир неча бор Жаҳон чемпионлигини қўлга киритган жамоамизни халқимиз деярли танимаслиги жуда алам қилади...

"Дарҳақиқат, шундай. Яқинда Туркияда бўлиб ўтадиган мундиал учун саралаш ўйинлари бўлиб ўтди. Биз ғалаба қозониб, ЖЧ иштирокчисига айландик. Тўғриси, бундан жуда ҳам таъсирландим. Эътибор қилдим, аммо бирорта ОАВ бу ҳақда ёзгани йўқ. Кейин, ўзим уларга шу хабарни беришларини сўраб илтимос қилдим. Бир нарса хафа қилди. Кўплаб сайтлар илтимосимга эътибор ҳам бермади. Кам сонли журналистлар пост қўйиб берди. Бизда ички биринчилигимизда тўп тепаётган оддий футболчиларни ҳам барча танийди. Терма жамоамизда 5 бор мундиалда зафар қучган акаларни эса...

Анча аввал Ўзбекистон ампутантлар терма жамоаси сардори Абдужамил Шукуров билан суҳбат уюштирган эдим. Яратилган имкониятлар борасида уларга ҳавас қилиб бўлмайди...

- Бизга жуда кўп нарса керак эмас. Озгина эътибор, бироз меҳр. Бу ҳам футболнинг бир бўлаги, аслида. Сўнгги йилларда деярли табиий чимга эга майдонлар қолмаяпти. Бизда ҳам ҳар бир клуб ўз машғулот базасига эга бўлишини орзу қиламиз. Қачонлардир бу амалга ошади деб умид қиламан. Барча муаммоларга қарамай, ватан шаъни учун тўп суришда давом этамиз.