"Ан-Наср" АПЛдан тўпурар ҳужумчи сотиб олмоқчи

"Ан-Наср" "Брентфорд" ҳужумчиси Йоан Виссани ўз сафига қўшиб олмоқчи.

L’Équipe хабарига кўра, Саудия Арабистони клуби "Брентфорд" сўраган суммани тўлашга тайёр. Аввалроқ 28 ёшли футболчининг нархи 50 миллион фунтдан кўпроққа баҳоланаётгани хабар қилинганди.

Қайд этилишича, бир неча ҳафта давомида "Ньюкасл", "Тоттенхэм" ва Саудия Арабистонининг "Неом" клублари лондонликлар билан келишувга эришиш учун алоқага чиққан. Бироқ, "асаларилар"нинг талаблари ҳозирча жуда юқори ҳисобланади. Аниқ сумма ошкор этилмаган, бироқ "Ан-Наср" уни таклиф қилишга тайёрлиги айтилмоқда.

Энди саудияликлар конголик футболчини Криштиану Роналду ва унинг жамоадошлари сафига қўшилишга кўндирмоқчи.

Ўтган мавсумда Висса АПЛда 35 та ўйинда майдонга тушиб, 19 та гол билан чемпионат тўпурарлари қаторидан 6-ўринни банд қилган эди.