"Ан-Наср" "Бавария" футболчисини сотиб олмоқчи

Мюнхеннинг "Бавария" клуби ҳимоячиси Ким Мин Жаэ Германия Бундеслигасини тарк этиб, Саудия Арабистони чемпионатига йўл олиши мумкин. Бу ҳақда журналист Санти Ауна ижтимоий тармоқлар орқали хабар берди.

28 ёшли футболчини Криштиану Роналду тўп сураётган "Ан-Наср" клуби ўз сафида кўришни хоҳламоқда. Томонлар ҳозирда музокаралар олиб бормоқда ва келишувга эришишга ҳаракат қилмоқда. Футболчининг ўзи ҳам Саудия клубига ўтишга қарши эмас.

Ўтган Германия чемпионати мавсумида Ким Мин Жаэ 27 та ўйинда майдонга тушиб, 2 та гол урди ва 2 та сариқ карточка олди. Унинг "Бавария" билан шартномаси 2028 йил ўрталаригача мўлжалланган. Футболчининг бозор қиймати 40 миллион еврога баҳоланмоқда.