Анчелотти чемпионлик масаласи кимга боғлиқ эканини айтди

“Реал” бош мураббийи Карло Анчелотти чемпионат якунланишига учта тур қолган пайтда жамоаси мусобақада пешқадамлик қилаётган “Барселона”дан ўтиб кетишига ишонмаяпти.

Амалдаги чемпион 35-турни 11 май куни “Камп Ноу”да ўтказади.

- Биз “Барселона” майдонидаги учрашувда ғалаба қозонган тақдиримизда ҳам каталонияликлардан бир очкога орда қолиб кетамиз.

Чемпионлик тақдири “Барселона”нинг қўлида. Агар бўлажак баҳсда зафар қучсак, чемпионлик учун умид ва имкон пайдо бўлади. Биз пухта тайёргарлик кўришимиз керак.

Каталониядаги ўйинни ҳал қилувчи баҳс, дейиш қийин, лекин шунга яқин бўлади, - деди Карло Анчелотти.

34-тур учрашувларидан кейин “Барселона” 79 очко билан биринчи поғонада бормоқда. Мадридликлар эса, ашаддий рақибдан тўрт очкога ортда қоляпти.