Анчелотти машҳур юлдузни ёрдамга чақирди

Бразилия терма жамоасини қабул қилиб олишга розилик берган Карло Анчелотти ҳали расман “Реал”ни тарк этмаган бўлса-да, янги ишга киришиб кетди.

65 ёшли мутахассис бразилиялик футболчилардан Неймар ва Каземиро билан ҳамкорлик борасида келишиб бўлганидан кейин ўзи шакллантираётган мураббийлар штабига яна бир машҳур юлдузни таклиқ қилди.

Италиялик мураббий Бразилия терма жамоасини бошқаришда Кака ёрдамидан фойдаланмоқчи. CNN Brasil нашрининг ёзишича, томонлар ҳамкорлик масаласида музокараларни бошлаб юборган.

Кака футболчи сифатида “Милан”да айнан Карло Анчелотти қўл остида тўп тепган. Кейин уларнинг йўллари “Реал”да ҳам кесишди.

2007 йили “Олтин тўп” соҳиби бўлган Кака Анчелоттининг штабида фаолият олиб боришга мойиллик билдирган. Маҳоратли футболчи 2017 йили профессионал фаолиятини якунлаганидан бери футбол фаолиятидан четда юрган эди.