Анчелотти нега дарров Неймарга қўнғироқ қилди?

“Реал”дан кетиши аниқ бўлган Карло Анчелотти мураббийлик фаолиятини Бразилия терма жамоасида давом эттирадиган бўлди.

65 ёшли мутахассис янги ишга ўтиши билан Неймарга қўнғироқ қилди. Анчелотти 33 ёшли футболчига 2026 йилги жаҳон чемпионатида айнан унга таянишини ва Бразилия терма жамоасига шу юлдузнинг етакчилик қилишини айтган.

Шунингдек, Анчелотти ўзининг собиқ шогирди – ҳозир “Манчестер Юнайтед”да ўйнаётган Каземиро билан ҳам гаплашган. Янги мураббий кейинги пайтда кўп танқид қилинаётган ярим ҳимоячининг тажрибасидан фойдаланиши билдирган.

Неймар Бразилия терма жамоасига охирги бор 2023 йилнинг кузида жалб қилинган эди. У терма жамоа сафидаги охирги ўйинида оғир жароҳат олиб, бир йилдан ортиқ вақт даволанишига тўғри келди. Каземиро ҳам икки йилдан бери ўз юртининг бош жамоасидан чорлов олмаётган эди.