Анчелотти нега Неймарни терма жамоага чақирмаганини айтди

Бразилия терма жамоаси бош мураббийи Карло Анчелотти нима учун "Сантос" ҳужумчиси Неймарни ЖЧ-2026 саралашидан ўрин олган Чили ва Боливияга қарши ўйинлар қайдномасига киритмаганига изоҳ берди.

"Неймарнинг ўзи тўғри айтганидек, гап жароҳатларда эмас, унинг жисмоний ҳолатида. Унда иқтидор бор, аммо рақобат жуда юқори - камида 70 нафар футболчи терма жамоага даъвогарлик қилмоқда. Биз шиддатли ўйнашни, ҳимояда қаттиқ туришни ва тўпни тезда ҳаракатлантиришни хоҳлаймиз. Таркиб танлашда адашмаслик керак. Бразилиянинг жаҳон чемпионатидаги сўнгги ғалабасидан деярли 24 йил ўтди - вақт келди", - дея Анчелоттининг сўзларини келтирди журналист Алфредо Педулла.

Август ойида Неймарнинг сонидан жиддий бўлмаган жароҳат олгани хабар қилинганди, аммо футболчининг ўзи унинг терма жамоада йўқлиги жароҳати билан боғлиқ эмаслигини айтди. Неймар 2023 йил октябрь ойидан бери терма жамоада майдонга тушмаган - ўшанда у Уругвайга қарши ўйинда олдинги хочсимон бойлами йиртилиб, узоқ муддатга сафдан чиққан эди.

Терма жамоа 4 сентябрь куни ўз майдонида Чили билан, 9 сентябрь куни эса Боливия меҳмони бўлади. Бразилияликлар учун бу учрашувлар турнир аҳамиятига эга эмас - Анчелотти жамоаси мундиал йўлланмасини муддатидан аввал қўлга киритган.