Анчелотти “Реал”да катта рекорд ўрнатиб қўйди

ФИФА томонидан ташкил этилган Қитъалараро кубок мусобақаси бош соврини Мадриднинг “Реал” жамоасига насиб қилди.

Мадридликлар финалда Мексика вакили “Пачука” жамоаси дарвозасига жавобсиз учта тўп киритди. Голлар Килиан Мбаппе, Родриго ва Винисиус Жуниор ҳисобига ёзилди.

Бу ғалаба Карло Анчелоттига “Реал” бош мураббийи сифатида 15-совринни келтирди. Ушбу натижа янги рекорд сифатида қайд этилди.

Ҳали “Қироллик клуби” тарихида ҳеч бир мураббий Карло Анчелоттичалик кўп соврин ютмаган.

Эслатиб ўтамиз, италиялик бош мураббий 2013-2015 йилларда ҳам “Реал”га устозлик қилган. 2021 йилда яна жамоа бошқарувини қабул қилиб олди ва ҳозиргача муваффақиятли иш юритиб келяпти.