Анчелотти “Реал”дан хайдалиши мумкинлигига муносабат билдирди

Испаниянинг амалдаги чемпиони “Реал” жорий мавсум “Барселона”га етарлича қаршилик кўрсата олмаяпти.  Қолаверса, мадридликлар Европа Чемпионлар лигаси чорак финал биринчи учрашувида “Арсенал”дан йирик ҳисобда мағлуб бўлгани бош мураббий Карло Анчелотти курсисини қимирлатиб қўйди.

65 ёшли италиялик мураббий мавсум охирида ишдан олиниши мумкинлиги айтилмоқда. Бу кўп жиҳатдан “Реал“ мавсумни қандай якунлашига боғлиқ.

Карло Анчелоттининг ўзи келажаги ҳақидаги гап-сўзларга ўз муносабатини билдирди.

- Келажагим ҳақида гапиришим шарт эмас, чунки ҳамма нарса шартномада очиқ-ойдин белгилаб қўйилган. Олдинда нималар бўлишини мавсум охирида муҳокама қиламиз. Клуб ҳар доим мени қўллаб-қувватлаб келади, айниқса, қийин вазиятларда, - деди Карло Анчелотти.

“Реал”ни 2021 йили қабул қилиб олган тажрибали мураббийнинг амалдаги шартномаси 2026 йилнинг ёзигача тузилган. Анчелотти қўл остида “Реал” футболчилари Испания чемпионлиги ва Европа Чемпионлар лигаси ғолиблигини қўлга киритди.