Анчелотти: “Вальверде ҳозирги кунда футбол оламидаги энг яхши футболчи”

“Реал Мадрид” мутахассиси Карло Анчелотти “Реал Вальядолид”га қарши баҳсдан аввал матбуот анжуманида иштирок этди. Италиялик бош мураббий навбатдаги тўқнашув ва баъзи бир футболчиларнинг ҳолати ҳақида гапирди. 
 
“Биз ҳозирда Ла Лига етакчисимиз. Шу сабабли, яхши ишлашни давом эттиришимиз керак. Эртанги тўқнашувда эса ғалаба қозонишимиз жуда муҳимдир. Бироқ, қийин учрашув бўлиши табиий, сабаби, рақибимиз кучсиз эмас албатта. 
 
Куртуанинг терма жамоага қайтиши? Агарда Тибо терма жамоага қайтишни истаса, бизда бу борада ҳеч қандай муаммо бўлмайди. У янги мураббий билан гаплашиши керак. 
 
Вальверденинг ҳолати ҳақида нималар дейсиз? Ҳар томонлама кучли ўйинчи ва у жамоамда жуда муҳим фигурадир. Уругвайлик ҳавбек турли позицияларда ўйнай олади. Бу эса унинг энг асосий устун тарафларидан биридир. Федерико ҳеч қачон мендан қаерда ўйнашини сўрамайди - бу ҳам унинг яна бир кучли томони. Шу боис, Вальверде ҳозирда футбол оламидаги энг яхши ўйинчидир. 

Себальоснинг ҳаракатларини қандай баҳолайсиз? Сўнгги кунларда Дани биз учун жуда муҳим эди. У ўзининг яхши формасини тиклади. Жамоа испаниялик ярим ҳимоячи билан яхшироқ ўйнайди. Албатта, катта ўйинларда ҳам ҳаракат қила олади, бунга эса ҳеч қандай шубҳам йўқ. 

Жароҳатдаги Тчуамени эртанги тўқнашувда иштирок этишга тайёр. Камавинга эса бир ҳафтадан кейин қайтишини кутмоқдамиз” – деди 65 ёшли мутахассис. 

Маълумот ўрнида, “қаймоқранглилар” Испания Ла Лигасининг 21-тур доирасида “Реал Вальядолид” билан куч синашади. Ушбу беллашув бугун 01:00 да старт олиши режалаштирилган.