"Андижон" черногориялик ҳимоячини олиб келди

"Андижон" клуби ўз таркибини янада кучайтириш мақсадида черногориялик ҳимоячи Миомир Журичкович билан шартнома имзолади.

Клубнинг расмий хабарига кўра, ушбу футболчи 1997 йилнинг 26 июль санасида Подгорицада таваллуд топган. Фаолияти давомида Франциянинг “Шолет”, Черногориянинг “Рудар”, “Искра”, “ОФК”, “Будучност Подгорица” ҳамда Босния ва Герцеговинанинг “Сараево” клубларида тўп сурган.

Футболчи 2023 йилнинг 4 сентябрь куни айнан “Сараево” клубига ўтган ва шу кунгача унинг охирги клуби ҳисобланади.

Журичкович фаолияти мобайнида жами 252 та ўйинда майдонга тушиб, 10 тадан гол урган ва голли пасни узатган.

Шунингдек, у “Будучност Подгорица” икки мартадан чемпионлик ҳамда Кубокни қўлга киритган.

Эслатиб ўтамиз, кеча "Бургутлар" икки ҳимоячиси - Илдар Маматказин ва Владимир Бубанья билан хайрлашганини эълон қилганди. Журичкович эса уларнинг ўрнини босиш учун таклиф қилинди.