"Andijon" legioneri Moskvaga jo‘nab ketdi

"Andijon"ning gruziyalik legioneri Nodari Kavtaradze Superliganing qoldirilgan 8-turida Toshkentda “Paxtakor”ga qarshi bellashuvda oyog‘idan jarohat olib, safdan chiqqandi. Oldin xabar berganimizdek, futbolchiga operatsiya zarur va bu amaliyot Moskvada o‘tkazilishi rejalashtirilgan.

Shu maqsadda Nodari 9 iyul kuni avval Tbilisidan Toshkentga keldi. Shaxsiy ishlari bilan poytaxtda shug‘ullandi. Ya’ni, Moskvaga operatsiyadan oldingi tibbiy tekshiruvga yo‘l olayotganligi uchun hujjatlashtirish ishlari bilan mashg‘ul bo‘ldi.

Tabiiyki, klub rahbariyati Nodari bilan bog‘lanib turibdi. Nodari kecha kechki payt 19:20 da Toshkent-Moskva yo‘nalishida Rossiya poytaxtiga jo‘nab ketdi. Moskvada tibbiy tekshiruvdan o‘tganidan so‘ng uning qachon operatsiya qilinishi ma’lum bo‘ladi.

“Andijon” matbuot xizmati.