"Андижон-SGS" бош мураббийи мағлубиятга қандай изоҳ берди?

Про лиганинг 2-турида “Арал” ўз майдонида “Андижон-SGS”ни қабул қилиб 3:2 ҳисобида ғалаба қозонди. Учрашувдан кейин меҳмон жамоа бош мураббийи Шохруҳ Ишанов журналистларнинг саволларига жавоб қайтарди.

- Учрашув тўғрисида фикрларингиз қандай?

- “Арал” мухлисларини ва жамоасини ғалаба билан табриклайман. Бир-биримизни билган жамоалар эдик. Биринчи марта тўқнаш келаётганимиз йўқ, бу тўртинчи учрашувимиз. Тайёргарлик кўриб келгандик. Кучлиги ютди.

- Етиб келиш қийин бўлмадими?

- Йўқ, қийин бўлмади. Раҳбарият томонидан шароит яратилди. Самолётда келдик ва яна самолётда қайтиб кетамиз. Оғир йўл босиб келганимиз йўқ.

- Ҳакамлар тўғрисида нима дейсиз?

- Ҳакамлар ҳақида ҳеч нима дея олмайман. Майдонда қарорни ҳакамлар чиқаради, биз эмас.

- Биринчи бўлимдан кейин вақт чўзишлар бўлди...

- Бу ҳамма жамоада бўлади, деб ўйлайман. Албатта, улар ҳисобда олдинга чиқиб олганидан сўнг бунақа нарсалар бошланди. Биз куч топиб ҳисобни тенглаштирдик. Озгина вақт қолганди. Бироқ яна ҳакамнинг қарори бўйича пенальти қўйилди – 3:2. Яхши ўйин бўлди. Кейинги учрашувга тайёргарлик кўрамиз.

- Майдон хусусида нима дейсиз?

- Майдон яхши. Бунақа майдонда ўйнаганмиз. Биринчи бор ўйнаётганимиз йўқ. Майдон масаласида эътирозим йўқ.