Андижон вилояти ҳокими чемпион футболчилар билан учрашди

Аввал хабар берганимиздек Андижон футбол академиясининг 2005 ва 2006 йилларда туғилган футболчилардан иборат “Андижон АФА "SGS" ShirinGaz” жамоаси ўтган ой Қозоғистон Республикасининг Олмота шаҳрида ташкил этилган халқаро мусобақада иштирок этиб қайтишди.

Улар ушбу турнирда Россия, Қирғизистон, Туркманистон, Тожикистон ва мезбон Қозоғистон жамоаларига қарши ўйинларда ажойиб ўйинлар кўрсатиб, ғолибликни қўлга киритишган эди.

Бугун мураббийлар Шохруҳ Ишанов ҳамда Лочин Гулдоев бошчилигидаги жамоа аъзоларини табриклаш учун Андижон вилоят ҳокими Шуҳратбек Абдураҳмонов вилоят футбол академиясига ташриф буюрди. Вилоят раҳбари учрашув давомида ёш футболчиларга келажакда бунданда юқори натижалар қайд этишларига тилакдош эканини билдирди. Ўз навбатида чемпион болалар ҳам самимий тилакларга муносиб жавоб қайтариб, келажакда янада юқори марраларни эгаллашга ваъда беришди.

Шунингдек, вилоят футбол федерацияси биринчи вице-президенти Бекзодбек Каримов ҳам ёш футболчиларни ғолиблик билан табриклади ва уларга ўз тилакларини билдирди.