Андижондаги ўйинда камбэкка камбэк билан жавоб қайтарилди

Бугун Ўзбекистон U-19 чемпионатининг 4-тур учрашувлари ўтказилди. “Андижон U-19” жамоаси ўз майдонида “Бунёдкор U-19” клубини қабул қилди.

Очиғи, анчадан бери бундай шиддатли, қизиқарли ва голларга бой ўйинни кўрмагандик. Учрашувда икки жамоа ҳам камбэкни бошқача усулларини кўрсатишди.

Аввалига андижонликлар 2:0 ҳисобида олдинга чиқиб олишганди. “Бунёдкор” мураббийнинг таркибда ўзгаришларга қўл уриши оқибатида меҳмонлар ўйинда туб бурилиш ясай олдилар. Натижада бирин-кетин мезбонлар дарвозасини уч бор аниқ нишонга олишга эришдилар - 2:3.

“Бунёдкор” ёшлари шу тариқа 2:0 ҳисобини иккинчи бўлимда 2:3 га айлантирган ҳолда камбэк кўрсатиб, ғалабани илиб кетмоқчи бўлиб турган бир пайтда катта саҳнага андижонликлар сардори Асилбек Айсаров чиқди. Марказий ҳимоячи бўлишига қарамасдан охирги қўшиб берилган дақиқаларда ўзи олдинга ўтди.

90+3-дақиқада дарвозабон билан яккама-якка чиқиб ҳисобни тенглаштирди. 3 дақиқа ўтганидан сўнг, Айсаровни жарима майдони ичида йиқитишгани учун ҳакам пенальти белгилади ва бу вазифани Асилбекнинг ўзи бехато амалга оширди ва “Андижон” ёшлари ҳам камбэк кўрсата олишларини исботлади - 4:3.

Афтидан, укалари “Андижон”нинг асосий таркибидаги акалари сингари охирги қўшиб берилган дақиқаларда гол уриб ғалабани илиб кетишни яхши ўрганишган кўринади.

Учрашувдан кейин мезбонлар мураббийи Фарҳод Ғофуров ўз таассуротлари билан ўртоқлашди.

- Биринчи таймда битта гол урдик. Кейин иккинчи бўлим бошларида ҳам гол уриб, ҳисобни 2:0 кўринишга оширдик. Охирида кўрдинглар, футболчиларимиз ўйинни ташлаб юборишди. Хатоларимиз эвазига дарвозамиздан 3 марта тўп ўтказдик. Кейин тактик ўзгаришларга қўл урдик.

Захирадан майдонга 2-3 нафар ўйинчиларни туширдик. Натижада 4:3 ҳисобида ютиб олдик. Бизни қилган ўзгаришларимиз ғалаба учун қаратилганди. Ҳисобни тенглаштирганимиздан кейин овқат иштаҳа пайтида келади дейишганидек, кейин ғалабани кўзладик ва мақсадимизга эришдик.

“Андижон” матбуот хизмати.