"Андижон"га Суперлигада қолиши учун қандай мукофот ваъда қилинганди?

Бугун Суперлига ўтиш ўйини бўлиб ўтди. Унда "Нефтчи" Фарғонада "Андижон"ни қабул қилди.

"Истиқлол" стадионида кечган баҳсда мезбонлар биринчи бўлиб ҳисобни очганди. Бироқ "бургутлар" кейинги дақиқаларда ирода намойиш этиб, 3:1 ҳисобида зафар қучди. Натижада, Отабек Ғуломхўжаев шогирдлари Суперлигада қолиш вазифасини уддалади.

Беллашувдан аввал, "Андижон" жамоасига чемпионатда жон сақлаб қолса, пул мукофоти ваъда қилинганди. Буни бош мураббий Отабек Ғуломхўжаев учрашувдан кейинги фикрларида ҳам тасдиқлади. Унинг айтишича, жамоа аъзолари бугуннинг ўзидаёқ мукофот пулларини олади. Аммо мураббий қандай сумма ҳақида гапирганини айтмади.